Оскуолалары миинэлээһин туһунан иһитиннэриилэргэ ИДьМ хоруйдаата

Бүгүн, олунньу 2 күнүгэр, Тулагы оскуолатыгар миинэ иитиллибитин туһунан биллибэт киһи иһитиннэрбит. Бу кэмҥэ дириэктэр уонна харабыл оскуолаҕа сылдьыбыттар. СИА-ҕа СӨ ИДьМ пресс-сулууспата иһитиннэрбитинэн, бу иһитиннэрии сымыйа. 

«Бу күннэргэ Дьокуускай икки оскуолатыгар эстэр устройстволары уурбуттарын туһунан анонимнай иһитиннэриилэр киирбиттэрэ. Миэстэтигэр тута суһал сулууспалар тиийбиттэрэ. Бэрэбиэркэ ыытыллан, бу сымыйа иһитиннэрии буолара биллибитэ. Бэрэбиэркэ салҕанар. Санаттахха, маннык хабааннаах сымыйа иһитиннэриилэр иһин холуобунай кодексынан уон сылга тиийэ көҥүл быһыллыан сөп», — диэн биэдэмистибэ иһитиннэрэр.