Судаарыстыбаннай Дуумаҕа оскуолаларынан Сэбиэскэй Саҥа дьыллааҕы остуоруйалары көрдөрөргө этии көтөхтүлэр

Судаарыстыбаннай Дуума дьокутаата Игорь Антропенко оскуолаларынан оҕолорго Сэбиэскэй кэминээҕи Саҥа дьыллааҕы остуоруйалары көрдөрөр туһунан этии киллэрдэ.

«Ахсынньыга Саҥа дьылы көрсөр түбүктэр саҕаланаллар. Тула барыта киэргэтиллэн, бырааһынньыктааҕы настырыанньаны үөскэтэр. Онон оҕолор  бырааһынньык тыынын билиилэрэ-көрүүлэрэ үрдүүрэ ордук суолталаах. Мин оскуолаларга Сэбиэскэй кэминээҕи  Саҥа дьыллааҕы остуоруйаларын уонна ойуулуктарын көрдөрөргө этии киллэриэхпин баҕарабын», — диэн кини РИА «Новости» кэпсээтэ.

Дьокутаат санаатынан, оҕолорго «Новогодние приключения Маши и Вити», «Двенадцать месяцев», «Зимняя сказка», «Снежная королева»,«Морозко», «Когда зажигаются елки» курдук остуоруйалары көрдөрүөххэ сөп. «Бэйэм оҕолорбун кытта ити киинэлэри дуоһуйа хаста да хатылаан көрбүтүм. Биллэн турар, аныгы оҕолорго урукку айымньылар интэриэһинэйэ аҕыйах, билиҥҥи ойуулуктар  курдук чаҕылхайа суох курдук көстүөхтэрин сөп. Ол оннугар ис хоһоонноро төһөлөөх үтүө, истиҥ санаанан толоруларый!», — диэн дьокутаат бэлиэтээтэ.