Оскуоланы бүтэрээччилэргэ туһалаах көрсүһүү

Арктикатааҕы судаарыстыбаннай култуура уонна ускуустуба института саас аайы оҕолору идэҕэ туһулуур сыаллаах улуустарга сылдьар.

Ыам ыйын 25 күнүгэр Арктикатааҕы судаарыстыбаннай култуура уонна ускуустуба институтун үлэһиттэрэ Горнай улууһун П.Д. Аввакумов аатынан киин бибилэтиэкэҕэ оскуола оҕолоругар анаан идэҕэ туһулуур көрсүһүүнү ыыттылар. Көрсүһүүнү институт доцена, педагогическай наука хандьыдаата Ольга Николаевна Пинигина иилээн-саҕалаан ыытта, оҕолорго институт туһунан сырдатта, ханнык идэлэргэ үөрэтэллэрин кэпсээтэ.

Ону тэҥэ институт 5 кууруһун устудьуона Айина Алыдаева дьону-сэргэни кэрэҕэ угуйар линогравюра ньыматынан уруһуйу кумааҕыга түһэриигэ маастар-кылааһы ыытта диэн Горнайдааҕы кииннэммит бибилэтиэкэ ситимэ иһиттиннэрэр.