Оскуолаттан оҕоҕо 200 тыһ. солк. кээмэйдээх моральнай хоромньу төлөннө

Дьокуускай куорат борокуратуурата быйыл саас Саха политиэхиньиичэскэй лиссиэй дьиэтигэр оҕо эчэйбит чахчытынан бэрэбиэркэни ыытта. Бу туһунан СӨ Борокуратуурата иһитиннэрэр.

Суут быһаарыытынан, 5-с кылаас үөрэнээччитэ физкултуура уруогун кэмигэр сүүрэ сылдьан, волейбол сиэккэтиттэн хабарҕатынан иилиллэн охтубут уонна муостаҕа кэтэҕинэн охсуллубут. Ол түмүгэр кыыс араас эчэйиилэри ылбыт. Оҕо эчэйиитигэр сиэккэ сыыһа турбута төрүөт буолбут. Итиниэхэ оскуола үлэһиттэрэ бастакы көмөнү оҥорууну уонна сокуоннай бэрэстэбиитэлгэ биллэрэри тэрийбэтэхтэр. Мэдиссиинэ көмөтүн кыыс оҕоҕо бэйэтэ тиийбитигэр оҥоһуллубут. Онон сибээстээн, борокуруор ирдэбилинэн оҕоҕо оскуолаттан 200 тыһ. солк. кээмэйдээх моральнай хоромньу төлөннө. Дисциплинарнай эппиэтинэскэ 2 буруйдаах киһи тардылынна.