Остуол оонньууларыгар күрэхтэстилэр

Дьокуускайга А.Е.Кулаковскай аатынан норуоттар доҕордоһууларын дьиэтигэр Саха Өрөспүүбүлүкэтигэр Үлэ сылынан, национальнай-культурнай түмсүүлэр VII Спартакиадаларынан, остуол оонньууларыгар күрэхтэһии күүрээннээҕэ ыытылынна.

«Настольные игры народов мира»  күрэхтэһиини саҕалыах иннинэ, аан дойду норуоттарын оонньууларыгар маастар-кылаастар ыытылыннылар. Ол курдук, «Новус», «Корнхол», «Джакколо», «Шаффлборд» оонньууларга, «Хабылыкка», «Хаамыскаҕа» күрэхтэстилэр диэн норуоттар доҕордоһууларын дьиэтин пресс-сулууспата иһитиннэрэр. Судьуйалар сүрүн быраабылалары, күрэхтэһии сыалын-соругун билиһиннэрдилэр. Нөҥүө күнтэн күрэхтэһии саҕаланна.

Остуол оонньууларын күрэхтэһиитигэр кылаабынай судьуйанан Николаева Элеонора Петровна,  Арассыыйаҕа остуол оонньууларын федерациятын эрэгийиэннээҕи салаатын бэрэссэдээтэлэ, РФ үөрэҕирии бочуоттаах үлэһитэ, СӨ үөрэҕирии туйгуна буолла. Кинини сэргэ, Кетехов Владимир Романович, Никифорова Наталья Николаевна, Аммосова Альбина Афанасьевна, Романова Саргылана Николаевна күрэхтэһиини көрдүлэр, сыаналаатылар.

А.Е.Кулаковскай аатынан норуоттар доҕордоһууларын дьиэтин генеральнай дириэктэрин бастакы солбуйааччы Александр Колесов турнир кыайыылаахтарын эҕэрдэлээтэ.

Спартакиадаҕа уопсастыбаннай түмсүүлэр: Саха сиригэр олорор таджиктар сойуустара, күн судаар дьаамсыктар удьуордара, «Саха эйгэтэ» община, Саха сирин норуоттарын ыччатын Ассамблеята, «Байтерек» казахтар общиналара,  узбектар диаспоралара, уо.д.а. барыта 14 хамаанда кытынна.

Күүрээннээх күрэхтэһии кэнниттэн кыайыылаахтар ааттаннылар.

Биирдиилээн күрэхтэһии кыайыылаахтарынан эр дьоҥҥо 1 м. Иванов Валентин Афанасьевич, 2 м. Слепцов Георгий Иннокентьевич, 3 м. Джалилов Махмуджон Рустамович ыллылар. Дьахталларга 1 м. Винокурова Наталья Иннокентьевна, 2 м. Муминова Саёхат Кароматуллоевна, 3 м. Тихонова Наталья Николаевна буоллулар. Маны сэргэ, хамаанданан 1 миэстэни «Саха эйгэтэ» община (Колесова С.Л., Иванов В.А.) хамаандата ылан үөрүү-көтүү буолла. Иккис бириистээх миэстэҕэ Саха сиригэр олорор таджиктар сойуустара (Сияров Д.Ш., Муминова С.К.) таҕыстылар. Үһүс бириистээх миэстэҕэ «Саха эйгэтэ» община (Винокурова Н.И., Ефремов Н.И.) өссө биир хамаандата тигистэ.

«Саха эйгэтэ» общинаттан Наталья Николаевна Тихонова — Долгууна, Наталья Иннокентьевна Винокурова санааларын үллэһиннилэр:

-Бу икки күн устатыгар олус сэргэхсийдибит. Остуол оонньууларын арааһыгар үөрэннибит, дьону-сэргэни кытта билистибит. Күүс-сэниэ бөҕө буоллубут. Общинабыт хамаанданан да, биирдиилээн да күрэхтэһиигэ кыайыылааҕынан тахсан, улаханнык үөрдүбүт. Норуоттар доҕордоһууларын дьиэтигэр наһаа үчүгэй тэрээһини бэлэхтээбиттэрин иһин махтанабыт.