От ыйа: Суоппарга аҕыс суолталаах уларыйыы…

От ыйыгар ГАИ үлэһитин тохтобулга ирдэбилин толорботох иһин ыстараап 12,5 төгүл үрдүөҕэ, ОСАГО полиһа суох суоппардары суол камералара кэтээн көрөр буолуохтара, үрдүк ыйааһыннаах таһаҕас тиэйэр тырааныспардар ыстарааптара үрдүүр, ону таһынан массыына сыаната биллэрдик үрдээн барыа. Бу туһунан «Газета.Ru» суруйар.

ГАИ ирдэбилин толорботохтор ыстарааптаныахтара

Бэс ыйын 24 күнүгэр Госдуумаҕа ГАИ үлэһитэ тохтотор ирдэбилин толорбот суоппарга ыстараабы үрдэтэр туһунан сокуон барылын бүтэһик ааҕыыга ылыммыта. Көннөрүүлэр илии баттаннахтарына, докумуон официальнайдык бэчээттэммит күнүттэн, 10 хонук ааспытын кэннэ, күүстэригэр киириэхтэрэ.

Сокуоҥҥа уларыйыы киирдэҕинэ, бу быраабы кэһии иһин суоппар 7-10 тыһыынча солкуобайга диэри ыстарааптаныа. Быраабыланы хос кэстэҕинэ, массыынаны ыытааччы суоппардыыр быраабын алта ыйга диэри быһыахтара.

Ыйааһын уонна габарит хонтуруолун тутуспатахтарга ыстараап сууматын үрдэтиэхтэрэ

Бэс ыйын бүтүүтэ Госдуума дьокутааттара суол быраабылаларыгар өссө биир көннөрүүлэри ылыммыттара. Бу көннөрүүлэр РФ Бэрэсидьиэнэ илии баттаабытын кэннэ, от ыйын ортотугар күүстэригэр киириэхтээхтэр. Ол курдук, аны таһаҕас тиэйэр массыына бас билээччилэрэ ыйааһын уонна габарит хонтуруолун ааһартан куотуммуттарын иһин 600 тыһыынча солкуобайга диэри ыстарааптыахтара. Ол курдук, суоппар 3-5 тыһ. солк., дуоһунастаах сирэй – 20-30 тыһ. солк., оттон юридическай сирэй – 50-150 тыһ. солк. ыстарааптаныа.

Евроборотокуолунан төлөбүрү улаатыннарыахтара

От ыйыгар саахал кыттыылаахтара буруйдааҕы быһаарсар боппуруоска сөбүлэспэт буоллахтарына, евроборотокуолунан страховой төлөбүр муҥутуур сууматын 100 тыһыынчаттан 200 тыһыынча солкуобайга диэри үрдэтэр сокуон үлэҕэ киирдэ. Ол эрээри, маннык төлөбүр суоппардар саахал буолбут сирин уонна массыына алдьаныытын хаартыскаҕа, видеоҕа устан бигэргэттэхтэринэ эрэ оҥоһуллуоҕа.

ОСАГО баарын-суоҕун камеранан кэтиэхтэрэ

От ыйын 1 күнүттэн суоппардар пилотнай эрэсиим быһыытынан ГАИ камераларынан ОСАГО полиһа суоҕун туһунан сэрэтиилэри ылан барыахтара. Эспэримиэн быһыытынан маннык сэрэтэр ыстарааптар сыл бүтүөр диэри туһаныллыахтара.

Иэстээхтэр кирэдьиит ылаллара уустугуруо

От ыйын 1 күнүттэн массыына кирэдьиитигэр саҥа хааччахтар олоххо киирэллэр (макропруденциальнай лимиттэр үлэлиэхтэрэ). Бааннар үрдүк иэстэх килийиэннэргэ кирэдьиит биэрэртэн аккаастыыллара элбиэҕэ.

Массыына сыаната үрдүөҕэ

От ыйыгар саҥа массыына сыаната ортотунан 2%-нан үрдүөҕэ, диэн «Авилон» автомобильнай бөлөх саҥа массыынаны атыылыыр генеральнай дириэктэрин солбуйааччыта Ренат Тюктеев сабаҕалыыр. Солкуобай куурса күүскэ уларыйдаҕына, массыына сыаната биллэ үрдүөҕэ, ол иһин тимир көлөнү атыылыһар былааны уһатар сатаммат.