От ыйын 1 күнүттэн ханнык сокуоннар олоххо киирэллэрий?

2025 сыл от ыйыттан Арассыыйаҕа үп-харчы эйгэтин, административнай быраабы, табаары маркировкалааһын быраабылаларын таарыйар саҥа сокуоннар олоххо киирэллэр. Бу уларыйыылар дойду олохтоохторун олоҕор-дьаһаҕар уонна дохуоттарыгар хайдах дьайалларын туһунан «Саха сирэ» саайт иһитиннэрэр.

Биэнсийэ: сүрүн уларыйыылар

2025 сыл от ыйын 1 күнүттэн Арассыыйаҕа биэнсийэни төлөбүрүгэр саҥа быраабылалар олоххо киирэллэр. 2025 сыл бэс ыйыгар диэри 80 саастарын туолбут гражданнар от ыйыгар автоматическайдык биэнсийэлэрин страховой чааһыгар икки төгүл үрдэтиллибит төлөбүрү – 17 815 солкуобайы ылыахтара. Хотугу оройуоннарга олохтоох коэффициент чэрчитинэн үрдэтиллиэҕэ. Эбии төлөбүргэ сайабылыанньа суруйар ирдэммэт.

Дьиэ-уот хомунаалынай өҥөтүн төлөбүрэ үрдүүр

От ыйын 1 күнүттэн дьиэ-уот хомунаалынай өҥөтүн тарыыптара  8,6-21,1 %-нан индексацияланыахтара. Холобур, Москва куоракка — 15%, оттон Москва уобалаһыгар (Подмосковьеҕа) – 13,3%. Санкт-Петербурга тарыыптар ортотунан — 14,6%, онтон Севастопольга – 12,6% үрдүөхтэрэ.

Төлөбүр ордук күүскэ Пермскай кыраайга, оттон саамай намыһах үрдээһин Амур уобалаһыгар күүтүллэр. Муниципалитеттарга ОДьКХ төлөбүрдэрин чуолкай көрдөрүүлэрин эрэгийиэн салайааччылара бигэргэтиэхтэрэ. Төлөбүрү муҥутуур индекстэртэн үөһэ таһаарар көҥүллэммэт. Бэлиэтээн эттэххэ, 2025 сыл саҕаланыаҕыттан тарыыптар үрдээбэтэхтэрэ.

Евроборотокуолунан төлөбүр  200 тыһ.солк. диэри үрдүүр

Суол саахалын кыттыылаахтара сөбүлэспэт түгэннэригэр, евроборотокуол төлөбүр сууматын 100-тэн 200 тыһыынча солкуобайга диэри үрдэтэр туһунан сокуон от ыйын 5 күнүттэн күүһүгэр киирэр. Евроборотокуол көмөтүнэн суол быһылаанын ГАИ үлэһиттэрэ суох, быһылаан буолбут сиригэр толорор кыах бэриллэр. Ону саахалга икки эрэ массыына кыттыбыт уонна эмсэҕэлээбит киһи суох түгэнигэр толоруохха сөп. Иккиэн суоппардар быһылаан евроборотокуолу миэстэтигэр толорорго сөбүлэһиэхтээхтэр. Ону таһынан, иккиэн ОСАГО полистаах буолуохтаахтар.

Баан хонтуруолун саҥа бэрээдэгэ

От ыйын 1 күнүттэн РФ Нолуок Кодексатын 86-с ыстатыйатыгар олоҕуран, баан эпэрээссийэлэрин хонтуруолун кэҥэтэр уларыйыылар күүстэригэр киирэллэр.

Өскөтүн баан каартатыгар киирэр «переводунан» киирэр харчылар дохуот быһыытынан сыаналаннахтарына, саҥа нолуок төлүүр эбээһинэһэ үөскүүр. Холобур, официальнайа суох хамнас, дьиэ куортамын төлөбүрэ, бэйэ дьарыктаах буолуу ыстаатыһа суохтарга төлөбүр, табаар эбэтэр өҥө атыыланар иһин киирэр харчы, ону тэҥэ атын дьонтон тиһигин быспакка киирэр улахан суумаҕа харчылар. Бу түгэннэргэ нолуок сулууспата «переводтарга» тустаах быһаарыы суруйарга ирдиир бырааптаах уонна наада буоллаҕына, дохуот нолуогун эбэтэр профессиональнай дохуот нолуогун эбии ааҕан төлөтүөн сөп. Саҥардыллыбыт быраабылалар хантан киирбитэ биллибэт, официальнай дохуотунан бигэргэтиллибэтэх эпэрээссийэлэри таарыйыахтара.

Социальнай уурунуу харчы

От ыйын 1 күнүттэн бааннар судаарыстыбаттан көмө миэрэлэринэн туһанааччыларга анаан анал социальнай уурунуу көрүҥүн арыйыахтара. Маннык кылаат муҥутуур суумата 50 тыһыынча солкуобайынан муҥурданар, оттон бырыһыаннаах ыстаапкатын хас биирдии баан тус-туһунан быһаарар бырааптаах. Бу кылааты баан саҥа килийиэннэрэ эбэтэр харчыларын 180 хонуктан ордуга суох кэмҥэ ууруммуттарга арыйтарыахтарын сөп.

Кирэдьиити биэрии ирдэбилэ күүһэрэр

От ыйын 1 күнүттэн саҥа хааччахтар киирэллэр. Ол курдук, бааннар ипотека биэрэллэригэр 20%-тан итэҕэһэ суох бастакы усунуостаах уонна иэс ылааччы иэһин ноҕурууската 50%-тан үрдүк буоллаҕына, уопсай кирэдьиит ахсаана 2%-тан ордук буолуо суохтаах. Оттон үрдүк иэстээхтэргэ тырааныспар кирэдьиитин биэрии уопсай ахсаанынан 20%-нан хааччах олохтонуо. Бу миэрэлэр үрдүк иэстээх дьоҥҥо кирэдьиит ылалларыгар мэһэйдэри үөскэтиэхтэрэ.

Сорох категория гражданнарга нэһилиэстибэни ылыы судургутуйар

От ыйын 15 күнүттэн Анал байыаннай дьайыыга өлбүт кыттыылаахтар дьиэ кэргэттэригэр нэһилиэстибэ докумуоннарын судургутук оҥорор сокуон күүһүгэр киириэҕэ.

Нэһилиэстибэни ылыныы ураты судургутуллубут бэрээдэгэ үлэҕэ киирэр. Холобур, байыас өлбүт күнэ биллибэт эбэтэр докумуон оҥоһуллубут күнүттэн үс ыйтан ордук  буоллаҕына, нэһилиэстибэ өлбүтүн туһунан туоһу сурук оҥоһуллубут күнүттэн арыллар.

Табаардары маркировкалааһын

От ыйын 1 күнүттэн «Честный Знак» тиһиккэ хас да саҥа табаардарга маркировка булгуччулаах буолар. Маркировкаланыахтаах табаардар испииһэктэригэр дезодораннар, баттах кырааскалара уонна хорунарга аналлаах сириэстибэлэр, сыт таһаарар бородууксуйалар, соустар, тумалар, кураанах мииннэр уонна уксуус эбилиннилэр. Маркировката суох атылааччыларга — чааһынай урбаанньыттарга 50 тыһ.солк. диэри, оттон тэрилтэлэргэ — 200 тыһ.солк. диэри ыстараап көрүллэр.