От ыйын 12 күнүгэр икки киһи ууга түстэ

Саха сиригэр от ыйын 12 күнүгэр икки эр киһи ууга тимирдэ, биир киһи булулла илик. Бу туһунан Саха сиринээҕи быыһыыр сулууспатын пресс-сулууспата суруйар.

От ыйын 12 күнүгэр Өлүөхүмэ оройуонун ЕДДС дьуһуурунай чааһыгар күнүс 12 чааска Чаара үрэҕэр мотуордаах оҥочоттон эр киһи уонна кыыс оҕо ууга түспүттэрин туһунан тыллаатылар. Кыыһы быыһаатылар, оттон эр киһи ууга тимирдэ. Токко олохтоохторо биэс буолан мотуордаах оҥочонон көрдөөһүҥҥэ таҕыстылар да, билиҥҥи диэри көрдөөһүн түмүгү аҕалбата.

Бэҕэһээ, от ыйын 13 күнүгэр, тимирбит эр киһини көрдөөһүҥҥэ Саха сирин быыһыыр сулууспатын 3 водолаза көттө. Бу туһунан Саха сиринээҕи быыһыыр сулууспата иһитиннэрэр.

Итини таһынан от ыйын 12 күнүгэр, киэһэ 21.30 часска Томпо оройуонун ЕДДС  дьуһуурунай чааһыгар Тыры үрэҕи туоруурга санаммыт биир научнай институт үлэһитин өрүс күүстээх уута илдьэ барбытын туһунан иһитиннэрии киирдэ. От ыйын 13 күнүгэр олохтоох дьаһалта күүһүнэн тимирбит киһи өлүгэ булулунна.