От ыйын 25 күнүгэр Амуртан аракыата көтүө

Аракыаталар көтүүлэрэ сир чугаһынааҕы куйаары баһылааһыҥҥа уонна аныгы технологиялары сайыннарыыга сүрүн оруолу ылаллар. Оттон СӨ Экология, айылҕаны туһаныы уонна ойуур хаһаайыстыбатын министиэристибэтин үлэтэ экологическай кутталы аҕыйатыыга туһуланар.

Айылҕа харыстабылын сокуонун тутуһуу – куйаар дьайыытын экологическай өттүнэн арыаллааһын буолар.

2025 сыл от ыйын 25 күнүгэр Амур уобалаһыгар «Восточнай» космодромтан «Ионосфера-М» сир аргыстаах «Союз-2.1б» аракыата көтүүтэ былааннанар. Аракыата арахсар чаастара түһэр сирдэринэн Саха сирин Алдан уонна Бүлүү оройуоннарын территориялара буолуохтара.

Аракыата көтүөн иннинэ уонна көппүтүн кэннэ СӨ экология министиэристибэтин «РИАЦЭМ» тэрилтэтин исписэлиистэрэ тулалыыр эйгэттэн анаалыс боруобатын ылыахтара, ону сэргэ радиацияны кээмэйдиэхтэрэ. Анаалыһы икки тутулуга суох лаборатория (Дьокуускайдааҕы уонна Хабаровскайдааҕы) ыыталлар.

Хас биирдии аракыата арахсар чаастарын тобоҕо хомуллан суох оҥоһуллар. Үлэ хайдах барбытын олохтоох былаас кыттыылаах хамыыһыйа ылынар, оттон анаалыстар түмүктэрэ СӨ Экологияҕа министиэристибэтин саайтыгар тахсар.

2016 сылтан ыла Алдан уонна Бүлүү оройуоннара туһаныллан, 17 көтүү тобоҕо түспүтэ. Аракыата тобоҕо түһэр учаастактарыгар экологическай чинчийии түмүктэринэн, тулалыыр эйгэни химическэй киртитии тахсыбыта быһаарыллыбатаҕа. Радиацияны көрдүү көтүү иннинээҕи таһымынан уонна өрөспүүбүлүкэҕэ орто көрдөрүүлэртэн үрдээбэт бэлиэтэнэр.

Кэмиттэн кэмигэр ыытыллар экологическай кэтээн көрүү уонна тобохтору суох оҥоруу экологическай куттал суох буолууну хааччыйыыга наадалаах.