От ыйын 8 күнэ: этиҥнээх ардах, күнүс +27° кыраадыс

Бүгүн, от ыйын 8 күнүгэр, Cаха сирин синоптиктара кэмиттэн кэмигэр ардах, сорох сиринэн этиҥнээх ардах түһэрин уонна күнүс +27° кыраадыска диэри сылыйарын сабаҕалыыллар.

Бу туһунан Саха сиринээҕи Гидрометеосулууспа саайта иһитиннэрэр.

Өрөспүүбүлүкэ соҕуруу, илин өттүгэр, киин улуустарга сорох сиринэн кыралаан ардыыр, кэмиттэн кэмигэр ардахтыыр, оттон күнүс хотугулуу-арҕаа  быстах ардах, сорох сиринэн этиҥнээх ардах түһүөҕэ.

Кыра тыаллаах, хоту байҕал кытылынан уонна этиҥнээх ардах кэмигэр тыала сөкүүндэҕэ 15-20 м. тиийэ күүһүрүө.

Салгын температурата түүн +9…+14°, халыннаҕына +3…+8°, күнүс +22…+27°, ардах түһэр кэмигэр +17…+22°, хотугулуу-илин +7…+12° кыраадыс сылаас.

Дьокуускайга салгын температурата түүн +13…+15°, күнүс +22…+24° кыраадыс буолуо. Сөҥүүтэ суох, хотуттан сөкүүндэҕэ 3-8 м. түргэннээх тыалырыа.