От үлэтин кэмигэр эр киһи илиитин пресс-подборщикка быһа тартарбыт

Саха сирин Нам улууһугар от үлэтигэр 50 саастаах эр киһи илиитин пресс-подборщикка быһа тартарбыт. Бу быһылаан туһунан сиһилии ЯСИА-ҕа Нам оройуонун киин балыыһатын кылаабынай бырааһа Ариан Сергеев кэпсээтэ.

«50 саастаах эр киһи Нам улууһугар аймахтарыгар от үлэтигэр көмөлөһө кэлбит. Кини оту рулоннуур аппараакка быа бырахпыт. Быата алҕас илиитигэр эриллэн хаалан, пресс-подборщикка тартарбыт. Түмүгэр илиитин тутатына быһа тартарбыт. Улахан алдьархайтан куотуммут. От үлэтигэр баар дьон түргэнник хамсананнар: футболканан уонна туох баарынан баайан баран, эмсэҕэлээччини тута балыыһаҕа киллэрбиттэр», — диэн ЯСИА-ҕа Ариан Сергеев кэпсээтэ.

Эпэрээссийэ икки чаас устата ыытыллыбыт  уонна уустуктук ааспыт. «Илитэ санныттан быстыбыт. Маннык үөһэнэн быстар түбэлтэ сэдэх. Ыарыһах быһылаан тахсыбыт сиригэр элбэх хаанын сүтэрбит, киниэхэ лиитирэттэн тахса донор хаанын куппуттар. Эпэрээссийэни уопуттаах хирург-быраастар Семен Сутаков уонна Айсен Федоров оҥордулар», — диир Ариан Сергеев. Билигин п туруга этэҥҥэ диэн сыаналанар, эр киһи балыыһаттан тахсарга бэлэмнэнэр.