Отчуот Муомаҕа саҕаланна

Бырабыыталыстыба отчуота бүгүҥҥүттэн Муомаҕа саҕаланна.

Вице-премьер Георгий Степанов салайааччылаах бөлөх икки хос бөлөххө арахсан нэһилиэнньэлээх пууннарга сылдьар. Үс күн нэһилиэктэринэн сылдьан, дьону-сэргэни көрсөн, кэпсэтэн, санааларын, ыйытыыларын, туруорсууларын истэн баран, кулун тутар 3 күнүгэр Хонууга кэлэн отчуоттуохтара.

Оробуочай бөлөхтөр бүгүн Чуумпу Кытылга уонна Улоахан Чыыстайга сылдьыахтара. Бастакы хос бөлөҕү СӨ Бырабыыталыстыбатын Бэрэссэдээтэлин солбуйааччы Георгий Степанов, иккиһи — СӨ үлэҕэ уонна социальнай сайдыыга миниистири бастакы солбуйааччы Альбина Трубина салайаллар.

Санатан эттэххэ, СӨ Бырабыыталыстыбатын отчуота олунньу 3 күнүттэн саҕаламмыта уонна кулун тутарга диэри ыытыллар. Көрсүһүүлэргэ сылдьан дьон-сэргэ ыйытыыларыгар хоруйдары ылар кыахтаахтар. Түмүгү «Саха» НКИХ көрдөрүөхтэрэ.

Кыраапыгы сиһилии бу сигэнэн киирэн көрүөххүтүн сөп: https://www.sakha.gov.ru/news/front/view/id/3480409

СӨ Ил Дарханын уона Бырабыыталыстыбатын пресс-сулууспата