Оттооһун хаамыыта

Сүөһү аһылыгын бэлэмнээһиҥҥэ үлэ үгэнэ.

Өрөспүүбүлүкэҕэ 175 тыһ. тахса га от охсуллубут, 165 тыһ. тахса туонна бэлэм буолбут, ол иһигэр мобильнай биригээдэлэр күүстэринэн 3 тыһ. тахса туонна. Бу туһунан брифиҥҥэ СӨ тыа хаһаайыстыбатын уонна ас-үөл бэлиитикэтин миниистирин солбуйааччы Сахаяна Павлова иһитиннэрдэ.

—Былаан туолуутугар бырыһыанынан көрдөххө Абый улууһа инники иһэр — 62%, иккискэ — Нам улууһа (54%), үһүс миэстэҕэ — Орто Халыма улууһа (51%). Таатта улууһугар 5 туонна сенаж бэлэмнэннэ, — диир кини.

От былаана 435 тыһ. туонна, 28 тыһыынча туонна сиилэс, 14 тыһыынча туонна сенаж буолар. Былырыыҥҥы 40 тыһыынча туонна от баар.

Окко 9 693 тыраахтар үлэлии тахсыбыт. Уопсайа 2313 механизированнай, 3257 полумеханизированнай, 82 атынан, илиинэн оттооччулар, 1933 илии звенолара. От хампаанньатыгар барыта 24 229 киһи үлэлиир.

Бүгүҥҥү күҥҥэ өрөспүүбүлүкэ үрдүнэн 105 мобильнай звено тэриллибит. Амма улууһугар — 35, Горнайга — 26, Мэҥэ Хаҥаласка – 10, Чурапчыга – 15, Орто Халымаҕа – 1, Томпоҕо – 8, Тааттаҕа – 2, Дьокуускайга – 4, Хаҥаласка – 4.

СӨ Ил Дарханын уонна Бырабыыталыстыбатын пресс-сулууспата