Оттук сезона Саха сирин 30 оройуонугар саҕаланна

Бу туһунан балаҕан ыйын 9 күнүгэр брифиҥҥэ Олох-дьаһах, хомунаалынай хаһаайыстыба уонна энергетика миниистирин солбуйааччы Сергей Киров иһитиннэрдэ.

«2024-2025 сс. күһүҥҥү кыстыкка бэлэмнэнии штатнай эрэсииминэн ыытыллар. Кыстыкка бэлэмнэнии хомунаалынай уонна электрическэй комплекстар, олорор дьиэ пуондатын эбийиэктэринэн 90% тэҥнэстэ», — диэн миниистир чопчулаата. Сергей Киров салалта күннээҕи хонтуруолугар хотугу оройуоннарга оттугу тиэйии ылыллыбытын бэлиэтээтэ.

«Бүгүҥҥү күҥҥэ 60 % таһаҕас тиэрдилиннэ. Таһаҕаһы тиэйии алтынньы ыйга диэри ыытыллар», — диэн спикер эттэ. Оттук сезонун саҕаланыытын уонна түмүктүүр туһунан быһаарыыны муниципальнай тэриллиилэр бэйэлэрэ ылыналлар. Нормативтарынан  салгын температурата орто кыраадыстан 8 кыраадыс намыһах биэс суукка устата турдаҕына ититии дьиэлэринэн холбонуохтаах.