Оттукка бэлэмнэнии үлэтэ куһаҕана суохтук барар

Бүгүн Ил Дархан Айсен Николаев тэлэбиисэринэн “Прямой разговор” биэриигэ быһа эпииргэ тахсан олохтоохтор ыйытыыларыгар хоруйдаата. Оттукка бэлэмнэнии туһунан билиһиннэрдэ.

— Билигин оттукка бэлэмнэнии үлэтэ күүскэ барар. Сорох улуустарга сылаас номнуо бэриллибитэ. Балаҕан ыйын 1 күнүттэн үөрэх саҕаланар. Ону кытта социальнай эбийиэктэргэ, бастатан туран, оскуолаларга, уһуйааннарга чугастааҕы нэдиэлэттэн ититэр ситим холбонон барыахтаах. Уопсайынан, үлэ куһаҕана суохтук барар. Билигин бары улуустарга бэлэми туоһулуур пааспардары ылалларыгар сорук турар. Хас биирдии хочуолунай чааһынайыттан, муниципальнайыттан, судаарыстыбаннайыттан тутулуга суох оттук кэмигэр бары бэлэм буолаллара ирдэнэр, — диэн Ил Дархан эттэ.