Пааркаҕа як оҕото төрөөтө

Мииринэй оройуонугар «Живые алмазы Якутии» пааркаҕа кулун тутар 27 күнүгэр Юлия диэн як үһүс оҕотун төрөттө. Саҥа төрөөбүт оҕо атаҕар туран, бэл, былырыын төрөөбүт эдьиийин Мартаны кытта билистэ.

Бу ньирэй ийэтин эмэр кыаҕа суох, тоҕо диэтэр, Юлия үүтэ суох. Дьиҥэ, оҕомсох эбит. Онон паарка үлэһиттэрэ кини оҕолорун төрүөхтэриттэн бүөбэйдээн, көрөн-истэн улаатыннараллар.

Муус-маҥан, ураты өҥнөөх Марта — паарка үлэһиттэрин уонна көрөөччүлэрин саамай таптыыр кыыллара. Төрүөҕүттэн дьоҥҥо олус убаммыт буолан, батыһа сылдьар, дьиэҕэ да киирэ сылдьар, тугу барытын интэриэһиргиир. Кып-кыра балтын олус сонурҕаан сытырҕаабыта, салаабыта. Сотору бииргэ оонньуур буолуохтара. Як оҕото 1 сааһыгар да олус улааппат эбит. Як муус-маҥан буолара сэдэх көстүү. Марта төбөтө эрэ кыратык хараарбыт эбит. Улахан як, дьэ, будьуруйан, түү да түү!

Кини 1 сааһын туолар төрөөбүт күнүгэр, кулун тутар 23 күнүгэр, паарка улахан бырааһынньыгы тэрийбитэ. 300-тэн тахса киһи кэлэн, кыттыбыта. Араас куонкурустары, викторинаны, квиз-оонньууну тэрийбиттэрэ. Бары бырааһынньык туордун чаастарын — Марта саамай сөбүлүүр оҕуруот аһа уонна дьаабылыкалара кистэммитин булбуттара. Ол кэнниттэн тэлиэгэҕэ ууран, чүмэчи уматан, үрэн, Мартаны күндүлээбиттэрэ.

Марта олус астынан, «туордун» мотуйбута. Төрөөбүт күннээх  муоһугар чаҕылхай баанчыгы иилбиттэр этэ. Кэлбит дьон бары астынан-дуоһуйан тарҕаспыттара.

Оттон паарка үлэһиттэригэр түбүктээх күннэр саҕаланнылар — саҥа төрөөбүт оҕону аһатыы, көрүү-харайыы чэпчэки дьыала буолбатах.