Хочуол алдьанан дьон эмсэҕэлээтэ

Арассыыйа ЫБМ Саха сиринээҕи салаатыгар Мииринэй оройуонун Алмазнай бөһүөлэгэр биир тэрилтэҕэ паарынан үлэлиир хочуол алдьанан, 1982 уонна 1973 с.т. эр дьон эчэйиини ылбыттарын туһунан иһитиннэрии киирбит.

Мииринэйдээҕи баһаарынай-быыһыыр гарнизон үлэһиттэрэ кэлиилэригэр, баһаара уота суоҕа этиллэр. Миэстэтиттэн 28 киһи эвакуацияламмыт. Эчэйиини ылбыт тостуулаахтар Мииринэй оройуоннааҕы киин балыыһатыгар ыытыллыбыттар.

Быһылаан буолбут сиригэр РФ ЫБМ, баһаары утары сулууспаттан, мэдиссиинэ суһал көмөтүттэн, ИДьМ отделениетыттан 31 киһи уонна  9 тиэхиньикэ үлэлээбит.

Быһылаан тахсыбыт төрүөтүн быһаарарга миэстэтигэр суһал силисэтийэлиир бөлөх үлэлиир.