Пальмира Петрова: «Михаил Николаев доруобуйа харыстабылыгар үгүһү оҥорбута»

М.К. Аммосов аатынан Хотугулуу-Илиҥҥи федеральнай университет мэдиссиинискэй институтун профессора Пальмира Петрова сүүрбэ сыл институту салайбыта.

«Михаил Ефимовичтыын үлэбитинэн 80-с сыллартан билсэр этибит. Михаил Ефимович өрөспүүбүлүкэбитигэр үрдүк мэдиссиинискэй үөрэх сайдарыгар үгүһү оҥорбута. Бастаан үлэлиирбитигэр үчүгэй баазабыт да суоҕа. Михаил Ефимович кылгас кэм иһигэр Мэдиссиинэ национальнай киинин туттарбыта. Онон мэдиссиинэ сайдарыгар уонна каадырдары бэлэмнээһиҥҥэ олук уурбута. Ол иннинэ биһиги эмтиир дьыалаҕа эрэ исписэлиистэри бэлэмниир буоллахпытына, аныгылыы киин баар буолуоҕуттан атын идэлэр сайдыбыттара. Билигин биһиэхэ стоматология, педиатрия кафедрата, сиэстирэлэри бэлэмниир үрдүк үөрэх, фармацевтическай, медико-профилактическай хайысхалар бааллар. Өрөспүүбүлүкэбитигэр мэдиссиинэҕэ наадалаах барыта баар.

Михаил Ефимович нэһилиэнньэ доруобуйатыгар олус кыһаллара. Кини бастакы ыйаахтара доруобуйа харыстабылыгар сыһыаннаах этилэр. Кини ыччаты кытта, тэрилтэлэр кэлэктииптэрин, преподавателлэри кытта өрүү көрсөрө. Онно куруук улахан сыаллары туруорара, дьону элбэҕи ситиһэргэ ностуруойдуура. Маныаха кини дьулуура уонна сиэрдээх майгыта-сигилитэ суолталаах дии саныыбын», — диэн Пальмира Петрова бэлиэтиир.

Ил Дархан уонна Бырабыыталыстыба дьаһалтатын пресс-сулууспата.