Парацетамол аутизмҥа тиэрдиэн сөп дуо?

Парацетамол уонна аутизм сибээстэрэ ситэ үөрэтиллэ илик диэн РИА-ҕа Пирогов аатынан университет фармацевтика уонна медицинскэй химия институтун фармакологияҕа кафедратын доцена Нина Киселева иһитиннэрдэ.

Киселева этэринэн, аутизм диэн уустук ыарыы, сүрүн өрүттэрэ тус-туспа биричиинэлэртэн үөскүүллэр, үксүгэр биир кэмҥэ дьайаллар. Үксүгэр, бу ыарыы геннары кытта сибээстээх.

Кини бэлиэтээбитинэн, аутизм сайдыытыгар тас дьайыылар оруолларын туоһулуур дааннайдар бааллар, ол иһигэр: сыстыганнаах ыарыылар, араас сүһүрүүлэр уонна төрүөх иннинээҕи истириэс, ол гынан баран, бу сабаҕалааһыннар эрэллээх дакаастабылынан бигэргэммэттэр.

«Тайленол» (парацетамол) аутизм ыарыытын үөскэтэр кутталлаах буолуон сөбүн туһунан саҥа тахсыбыт дааннайдар эмиэ гипотезаны чопчу дакаастаабаттар.

Исписэлиис улахан дуоза (4,0 граммтан элбэх) элбэх ыарахан охсууну үөскэтиэн сөбүн, сүрүннээн быар улаханнык эмсэҕэлиирэ көстөрүн, оттон кыра дуозаҕа үчүгэйдик тулуйулларын чуолкайдаата.

Үгүс чинчийиилэр «Тайленол» туттуллуутун уонна оҕолорго аутизм сайдыытын икки ардыларыгар сибээс баарын көрдөрөллөр, ол гынан баран, кинилэр ону туһаныы төрүөттэрин толору ырытан көрбөттөр.

Кини парацетамол вируснай инфекция сибикилэрин, ол курдук, үрдүк кыраадыһы, төбө ыарыытын уонна былчыҥ ыарыытын чэпчэтэргэ элбэхтик туттулларын быһаарда. Элбэх чинчийиилэр вируснай инфекциялар уонна ньиэрбэ систиэмэтин ыарыыларын, ол иһигэр аутизм үөскүүр кутталын кытта күүстээх сибээс баарын көрдөрдүлэр. Ол эбэтэр, хат сылдьан, вируснай инфекциянан ыарыйдахха, ол ыарахан содулга тиэрдиэн сөп.

Онон,  ийэлэр хат сылдьан испит парацетамоллара оҕоҕо аутизмы үөскэтэр диэн этэр кыах суох.