Парашютист уонна десантник баһаарынайдар сатабылларын тургуталлар

Анал үөрэҕи, бэлэмнэниини ааспыт парашютист баһаарынайдар үһүс күнүн ыстанаары бэлэмнэнэллэр. Ленскэйтэн, Үөһээ Бүлүүттэн, Сунтаартан барыта 30 киһи 12-тэ ыстаныахтаах. 

Таһымы үрдэтэр анал кууруска бары уопуттаах инструктордар үлэлииллэр, инвентардара толору техническэй көрүүнү ааһан, куттала суох түһүүнү хааччыйаллар. Уолаттар бастакы ыстаныыларыгар долгуйбут буоллахтарына, билигин туруктара бөҕөх.

1000 миэтэрэ үрдүктэн парашютист ортотунан 3 мүнүүтэнэн сиргэ тиийэр. Онон үстэ эргийэн кэлэн, утуу-субуу үөһэттэн үстүү-түөртүү киһини ыытан иһэллэр. Халлааҥҥа эргийэ оонньуур парашюттаах дьон, араас албастары оҥорон бэйэ-бэйэҕэ мэһэйдэспэккэ биир туочукаҕа кэлэн түһүөхтээхтэр.

Саамай сүрүнэ — эчэйбэт курдук тыал утары, сиргэ икки атаҕынан тирэнэ түһүөхтээхтэр. Маннык элбэх эрчиллиини ааһан уолаттар ойуур баһаарын умулларыыга үлэлиэхтэрэ.

Сунтаар улууһун дьаһалтатын пресс-сулууспата