Парковкаҕа иирсээн холуобунай дьыалаҕа тиэрдибит

ИДьМ «Дьокуускайдааҕы» 2-с №-дээх полиция отделын дьуһуурунай чааһыгар «Тойота Корса» мааркалаах массыынаны күрэтии туһунан сайабылыанньа киирбит.

Быһылаан киэһэ Короленко уулуссаҕа баар биир олорор дьиэ таһыгар тахсыбыт. Бэрэбиэркэ кэмигэр полиция үлэһиттэрэ уорбаланааччыны быһаардылар.  Хаҥалас улууһуттан төрүттээх 30 саастаах эр киһи  буолара биллибит, диэн ИДьМ пресс-сулууспата иһитиннэрэр.

Силиэстийэҕэ быһаарыллыбытынан, массыына хаһаайына тырааныспарын подъезд таһыгар туруорбутугар, ол сиргэ эмиэ парковкаланаары сылдьыбыт дьиэ биир олохтооҕун кытта тыл-тылга киирсэн, иирсээн тахсыбыт. Мөккүспүт суоппар массыынатыттан тахсан, күүһүнэн эмсэҕэлээччини массыынатын иһиттэн соһон таһаарбыт уонна тырааныспары атын сиргэ көһөрөн туруорбут. Эмсэҕэлээччи полицияҕа тыллаабыт. РФ Холуобунай кодексатын 166-с ыстатыйатынан («Тырааныспары күрэтии») уонна РФ Холуобунай кодексатын 116-с ыстатыйатынан («Кырбааһын») холуобунай дьыалалар тэрилиннилэр.