Парковкаҕа тахсыбыт иирсээн холуобунай дьыалаҕа тириэртэ

Киин куоракка парковка боппуруоһа сытыытык турар. Онон, массыыналаахтар парковка көрдөөн айдаарсар да түгэннэрэ тахсар.

ИДьМ Дьокуускайдааҕы салаатын  полиция 2-с отделын дьуһуурунай чааһыгар   «Тойота Корса» массыынаны күрэтэн барыынан сайабылыанньа киирбит. Быһылаан Короленко уулуссаҕа тахсыбыт.

Бэрэбиэркэ кэмигэр полиция үлэһиттэрэ уорбаланааччы ким буоларын быһаарбыттар.  Ол курдук  30 саастаах Хаҥалас улууһуттан төрүттээх эр киһи эбит.

Полицейскайдар быһаарбыттарынан, сайабылыанньалаах киһи   массыынатын  подъезд таһыгар туруорбут.  Онуоха   эр киһи уонна туһааннаах дьиэҕэ олорор киһи икки ардыгар   иирсээн тахсыбыт. Кини эмиэ бу сиргэ массыынатын туруорар былааннаах  эбит. Буруйдаах   күүһүнэн  эмсэҕэлээччини массыынатыттан таһаарбыт. Итиэннэ атын киһи массыынатыгар олорон атын парковкаҕа илдьибит.  Онон эмсэҕэлээччи полицияҕа сайабылыанньа суруйбут.

Билигин туһааннаах быһылаанынан РФ Холуобунай кодексын 166 ыст. («Неправомерное завладение автомобилем без цели хищения») уонна 116  ыст. («Побои») холуобунай дьыала көбүтүллүбүт диэн ИДьМ пресс-сулууспата иһитиннэрдэ.