Парламент истиилэрэ: Саха сирин түмэллэрин сайыннарыы туһунан

Ил Түмэҥҥэ ыытыллыбыт парламент истиилэригэр Саха сирин түмэллэрин сайыннарыы кыһалҕаларын уонна кэскилин дьүүллэстилэр.

Мунньах саҕаланыыта норуот дьокутаата Виктор Губарев Ил Дархан Айсен Николаев ыам ыйын 20 күнүнээҕи ыйааҕынан Саха сиригэр сорох улуустарынан эрэгийиэннээҕи ыксаллаах быһыы-майгы эрэсиимэ биллэриллибитин санатта.

«Быйылгы халаан уутугар өрөспүүбүлүкэ үгүс нэһилиэгэ эмсэҕэлээтэ. Олохтоохтор дьиэлэрин-уоттарын, сүөһүлэрин, малларын-салларын ууга былдьаттылар. Бу иэдээҥҥэ култуура нэһилиэстибэтин эбийиэктэрэ, холобур, М.К.Аммосов аатынан СӨ Судаарыстыбаннаһын устуоруйатын өрөспүүбүлүкэтээҕи түмэлэ кытта эмсэҕэлээтэ. Онон билигин түмсэммит көмө оҥорорбут олус суолталаах», — диир Виктор Губарев.

Парламентарий Саха сиригэр түмэллэри арыйыы устуоруйатын санатта, ону тэҥэ бу эйгэҕэ түмэл үлэһиттэрэ ураты кылааты киллэрэллэрин бэлиэтээтэ: «Саха сирин түмэллэрэ үүнэр көлүөнэни патриотическай иитиигэ биир саамай көдьүүстээх ньыманан буолаллар уонна салгыы Саха сирин култуурунай нэһилиэстибэтигэр дьоһун кылааты киллэрэллэр».

Санаттахха, Уһук Илиҥ уокурук субъектарын ортотугар Саха сирэ түмэллэрин ахсаанынан уонна эбийиэктэринэн бастакы миэстэни ылар. 2024 сыл тохсунньу 1 күнүнээҕи туругунан өрөспүүбүлүкэ судаарыстыбаннай уонна муниципальнай түмэллэрин сүрүн пуондатыгар 509 тыһ. тахса араас эспэнээттээх. Ону кытта үгүс оскуолалар иһинэн түмэллэр тэриллибиттэрэ. Мунньах кэмигэр түмэллэр билиҥҥи туругун, кыһалҕаларын уонна инники кэскилин туһунан Саха сирин сүрүн түмэллэрин салайааччылара санааларын, иниики былааннарын кэпсээтилэр. Норуот дьокутааттара салайааччылартан судаарыстыбаннай түмэллэри анал оборудованиенан хааччыйыы, «Азия оҕолоро» норуоттар икки ардыларынааҕы успуорт  оонньууларын ыытарга бэлэмнэнии, өрөмүөннээһин уонна матырыйаалынай хааччыйыы өттүттэн үп-харчы туһунан туоһуластылар.

Норуот дьокутаата Андрей Николаев СӨ Үөрэҕин уонна билимин министиэристибэтиттэн Култуураҕа министиэристибэтигэр Б.Н.Андреев аатынан Элгээйитээҕи экологическай киин салайыытын биэрэр наадалааҕын эттэ. Бу киин билигин эбии үөрэхтээһин тэрилтэтэ буолар уонна култуура эбийиэктэригэр анаммыт национальнай бырайыактарга кыттар кыаҕа суох.

Оттон норуот дьокутаата Игорь Григорьев Алдан геологическай түмэлиттэн «Якутгеология» тэрилтэ сабыллыбытынан 40 тыһ. эспэнээти биэриини хонтуруолга ыларга көрдөстө.

Дьүүллэһиигэ этиллибиттэри учуоттаан парламентскай истии кыттыылаахтарыгар сүбэ этиилэрин докумуонун бырайыага ылылынна. Салгыы докумуон Ил Түмэн туһааннаах сис кэмитиэтин мунньаҕар бигэргэниэҕэ диэн Ил Түмэн пресс-сулууспата суруйар.