Парламентарий дьахталлар оруоллара улахан

Кулун тутар 5 күнүгэр Ил Түмэҥҥэ парламентарий дьахталлар кулууптарын Саха сирин дьахталларын бастакы сийиэстэригэр, Кыайыы 80 сылыгар анаммыт мунньахтара саҕаланна.

— Лоп курдук 100 сыллааҕыта Аан дойду дьахталларын күнүн көрсө Үлэһит дьахталлар бастакы сийиэстэрэ буолбута. Сийиэскэ 86 дэлэгээт дьахтар кыттыбыта. Ол саҕана дьахтар туох да бырааба суоҕа, кинини халыымҥа атыылаһан ылаллара. Сийиэс дэлэгээттэрэ дьахтар быраабын турууласпыттара, халыым үгэһэ сүтэрин, дьахтар тэҥ бырааптанарын, үөрэхтэнэрин ситиспиттэрэ. Актыбыыс, лиидэр дьахталлар бары көлүөнэлэрин эниэргийэлэрэ, дьулуһуулара уопсастыба олоҕун тупсарарга туһуланар, — диэн Ил Түмэн парламентарий дьахталларын кулуубун бэрэссэдээтэлэ Антонина Григорьева эттэ.

Мунньах кыттыылаахтара бастакы сийиэс кыттыылааҕа Мария Яковлева-Овчинникова сиэнэ, СӨ үтүөлээх учуутала Елена Иванцова тэйиччиттэн эҕэрдэтин ыыппытын  иһиттилэр. Кини эбэтин, ийэтин туһунан кэпсээтэ.

Маны тэҥэ, дьахталлар бастакы сийиэстэрин дэлэгээттэрин сыдьааннара — учуонай, СӨ үөрэҕириитин туйгуна Мария Соловьева (Ойуунускай ийэтэ, дэлэгээт Евдокия Слепцова хос сиэнэ, Былатыан Ойуунускай сиэнэ) уонна социальнай сулууспа туйгуна Варвара Сизых (дэлэгээт Варвара Кулаковская сиэн балта, Өксөкүлээх Өлөксөй хос сиэнэ) эҕэрдэлэрин тиэртилэр.

Дьокутаат Елена Голомарева Арктикаҕа аһы-үөлү тиэрдиигэ дьахтар уопсастыбаннай түмсүүлэрин оруолун туһунан кэпсээтэ. Кини хоту улуустарга нэһилиэнньэни кытта көрсүһүүлэригэр табаны иитиигэ, бэйэ хаһаайыстыбатын сайыннарыыга биир да ыйытыы киирбэтэҕиттэн хоиойбутун туһунан иһитиннэрдэ.

Дьокутаат Алена Атласова дьахталлар тустарыгар ылыллыбыт сокуон көҕүлээһиннэрин туһунан сырдатта. Кини төрөөһүнү элбэтиигэ, элбэх оҕолоох дьиэ кэргэттэри өйөөһүҥҥэ, уһун үйэлэниигэ көмө миэрэлэрин кэпсээтэ.

Ил Түмэн доруобуйа харыстабылыгар бастайааннай кэмитиэтин бэрэссэдээтэлэ Светлана Давыдова саахар диабета, дьахтар төрүүр-ууһуур уорганнарын ыарыылара, хат дьахтар гестоһа элбээбитин бэлиэтээтэ. Аборт ахсаана намтаабыт курдук эрээри, ити судаарыстыбаннай балыыһалар көрдөрүүлэрэ, үгүс дьахталлар чааһынай килииникэлэргэ харчы төлөөн оҕо түһэртэрэллэр, ону учуокка ылыахха наада. Төрүүргэ-ууһуурга дьахтар эрэ буолбакка, эр киһи доруобуйатын эмиэ көрүөххэ наада диэн эттэ.

Социологическай наука дуоктара Ульяна Винокурова 100 сыллааҕыта дьахталлар балаһыанньаларын, биир үйэ устата сийиэс туруорбут соруктарыттан туох туолбутун кэпсээтэ. Кэлэр 100 сылга туох соруктары туруорар туһунан чопчулаата. Кини төрөөһүн, ыал буолуу аҕыйаан, арахсыы элбээн иһэрин бэлиэтээтэ. Онон уопсастыбанньык дьахталлар бастакы уочарат дьиэ кэргэни харыстааһыҥҥа сыал-сорук туруорунан  үлэлиэхтээхтэр диэн эттэ. Ыарахан кэмнэргэ дьахтар турунан кэлэр, уопсастыба ис күүһүн уһугуннарар. Манна парламентарий дьахталлар оруоллара улахан.

Мантан салгыы парламентарий, уопсастыбанньык дьахталлар байыастарга, кинилэр дьиэ кэргэттэригэр көмө, тыа сирин сайыннарыы, дьиэ кэргэҥҥэ күүһүнэн өттөйүү, инбэлиит оҕолору кытта үлэ, о.д.а. туһунан кэпсэттилэр.

Түмүккэ бастыҥ уопсастыбанньыктарга наҕараадалары туттардылар.