Парламентарийдар тохтобулга уонна пааркаҕа табах тардыы иһин ыстарааптыырга сокуон барылын өйөөтүлэр

Саха сиригэр тохтобулга уонна пааркаларга табах тардар иһин ыстараап олохтуур санаалаахтар.

Бу туһунан сокуон барылын норуот дьокутааттара алтынньы 22 күнүгэр Ил Түмэн тохсус уочараттаах пленарнай мунньахха бастакы ааҕыыга өйөөтүлэр.

Буруйдаахтар табаҕы тардыы иһин 500 солк. суумаҕа ыстарааптаныахтара:

• уопсастыбаннай тырааныспар тохтобулугар;
• сынньалаҥҥа, туризмҥа, физическэй култууранан уонна успуордунан дьарыктанарга анаммыт пааркаҕа.

Уларыйыылар Саха сирин Административнай кодексатыгар киллэриллэллэр. Административнай хааччахтар кээмэйин быһаарыыга федеральнай сокуон нуормалара учуоттаннылар.

Билигин федеральнай сокуонунан дойду эрэгийиэннэрэ  судаарыстыбаннай былаас уорганнарын кэккэ уопсастыбаннай сирдэргэ уонна эбийиэктэргэ табаҕы, никотиннаах бородууксуйаны эбэтэр кальяны тардыыга эбии хааччахтары киллэрэр бырааптаахтар. Ол курдук, дойду 28 субъегар табаҕы тардыыга эбии хааччахтар олохтоммуттара. Бу субъектарынан бары кэриэтэ уопсастыбаннай тырааныспар тохтобулугар итиэннэ онтон 15 миэтэрэ чугас сиргэ табаҕы, никотиннаах бородууксуйаны тардар сокуонунан бобуулаах.

Олоххо киирбит федеральнай сокуонунан табах тардар бобуллар:

• Оскуолалар, училищелар уонна атын үөрэх тэрилтэлэрин кытта сэргэ култуура, успуорт уонна ыччат дьыалаларыгар уорганнарын эбийиэктэрин таһыгар;
• Поликлиникалар, балыыһалар, санаторийдар, о.д.а. итинник өҥөнү оҥорор тэрилтэлэр эбийиэктэрин таһыгар;
• Тимир суол баксаалларын, массыына баксаалларын, аэропортарын, муора уонна өрүс портарын, ону таһынан метро ыстаансыйаларын эбийиэктэрин 15 миэтэрэ чугас сиргэ;
• Оҕо былаһааккаларыгар уонна сөтүө сиригэр;
• Сапыраапкаларга;
• Лифтарга уонна элбэх кыбартыыралаах дьиэлэр уопсай туһаныы подъездтарыгар;
• Тырааныспарга, гостиницаларга, рестораннарга, офистарга уонна арендаҕа олорор кыбартыыраларга.