Паромнар күһүҥҥү-кыһыҥҥы эрэсиимҥэ көстүлэр

Алтынньы 23 күнүттэн Дьокуускай-Аллараа Бэстээх хайысханан паром сырыыта күһүҥҥү-кыһыҥҥы эрэсиимҥэ көстө диэн Тырааныспар, суол хаһаайыстыбатын министиэристибэтэ иһитиннэрэр. 

Министиэристибэ бу уларыйыылар өрүскэ гидрологическай усулуобуйа мөлтөөһүнүнэн уонна  муус туруута саҕаланыытынан сибээстээхтэрин тоһоҕолоон бэлиэтээтэ.

«Саха сирин паромнара» ХЭТ бигэргэппит тарыыба киирдэ. Бу тарыып үрдүк буолар, тоҕо диэтэр, мууһу солоон айанныырга, буксирынан состорорго элбэх уматык, бириэмэ, сыра барар. Күһүҥҥү эрэсиим  алтынньы ый бүтүөр диэри салҕаныаҕа, ол кэнниттэн паром сулууспата өрүһү туоруур кыһыҥҥы суол аһыллыар диэри үлэтин тохтотуоҕа», — диэн тырааныспар министиэристибэтэ иһитиннэрэр.

Паромнар билигин үлэлии сылдьаллар. «Механик Курбатов» буксир алта парому арыаллыыр. Суудуналар бириэмэнэн буолбакка, туолалларынан тиэллэн  бараллар.

Туһанааччыларга табыгастаах буоллун диэн, паромҥа саҥа төлөбүр систиэмэтэ киирдэ. Массыына уонна пассажир айанын иһин төлөбүр Өлүөнэ өрүс икки кытылыгар туруоруллубут төлөбүр терминалларыгар эрдэ оҥоһуллар.