«Паша Адамова кэрэ киэһэни бэлэхтээбитин умнубаппын…»

Майа орто оскуолатыгар үөрэнэ сырыттахпына уус-уран самодеятельность алыс сайдыылаах этэ. Үҥкүү, ырыа, дыраама куруһуоктарын кыттыылаахтара суох оскуолаҕа бэйэтигэр, Майа кулуубугар, оройуоҥҥа биир да кэнсиэр буолбат этэ.

Оннук биир кэнсиэркэ бииргэ үөрэнэр кыыһым Паша Скрябина, кэлин СӨ норуодунай артыыската буолбут Прасковья Павловна Адамова Владимир Маяковскай «Стихи о советском паспорте» аахта. Мин онно дьэ, сөхтүм: хоһоон иһигэр хайдахтаах курдук киирэн миэхэ

« …Читайте,
завидуйте,
я –
гражданин
Советского Союза»

— диэн төрөөбүт дойдунан киэн туттууну, социализм диэн киһилии уопсастыба буоларын туһунан өйдөбүлү укпутун. Биһиги көлүөнэ оннук олордубут даҕаны.
Паша биһиэхэ 9-с кылааска кэлбитэ уонна майгыта үчүгэйэ, кэпсиирэ-ипсиирэ, туттара-хаптара, үөрэрэ-көтөрө — биһигини бэйэтин тула мунньубута эрэ баар буолара. Ол курдук, кини идеятынан, биһиги кылааспытынан бары биир иллээх дьиэ кэргэн буолуоххайын диэн ким эбээ-эһээ, ким ийэ-аҕа, ким оҕолор, ким күтүөт-кийиит, сиэн буола оонньоон, дьиэ кэргэн сыһыанын туһунан өйдөбүл уктаҕа.
Паша оҕо эрдэҕиттэн кэрэҕэ тардыһыыта, дьону-сэргэни ыллаан-туойан, хоһоон ааҕан, испэктээккэ оонньоон үөрдэ-көтүтэ, олох туһунан толкуйдата сылдьыан баҕата туолан, дойду тэбэр сүрэҕэр Москва куорат Щепкин аатынан театральнай училищетын бүтэрэн, артыыс идэтин ылан, дойдутугар төннөн кэлэн үлэ үөһүгэр түспүтэ.
Оскуола кэнниттэн бары тус-туспа идэлэнэн өрөспүүбүлүкэ араас оройуоннарынан тарҕаһан, дьиэ-уот тэринэн, тус-туспа дьылҕаланан, өр кэмҥэ көрсүбэтэхпит да иһин, Паша ситиһиилээх режиссер, артыыс, биир идэлээҕэр Адамов Савва Алексеевичка кэргэн тахсан иллээх дьиэ кэргэн Далбар Хотуна, үчүгэйкээн оҕолор күн күбэй ийэлэрэ буолбутун истэн билэр уонна биир көлүөнэ оҕолоробут диэн киэн туттар этим.
Паша бииргэ үөрэммиттэрин олус истиҥник саныыр буолан, устудьуоннуу сылдьан Чүүйэ Эбэтигэр сайын биһиги кылаастан Тимофеева Ася, Потапова Альбина, Петров Альберт уонна мин окко үлэлии сырыттахпытына анаан-минээн кэлбитэ. Күн аллараа түһэн эрэрэ. Киэһээҥҥи аһылыкка мустан, улахан от ураһа иһигэр олордохпутуна: «Оо, кимнээх эрэ иһэллэр» диэбиттэригэр сүүрэн тахсан кыҥастаһыы буолла. Альберт спортсмен, сүүрүк бэрдэ «Пашалаах иһэллэ-эр!» диэтэ да, утары сүүрэн элэстэннэ. Ыраахтан көрдөхпүнэ маҥан ырбаахылаах, улахан полялаах сэлээппэлээх, олох Иван Тургенев барышняларын курдук Паша уонна билбэт кыргыттарым иһэллэр. Дьэ, түүн буолуор диэри кэпсэтии-ипсэтии, үөрүү-көтүү бөҕө этэ. Өссө хоту Жиганскай оскуолатыгар физиктыы сырыттахпына, Саха тыйаатыра гостуруоллуу кэлбитэ. Мин бэстилиэнэй уруоктаах буолан, испэктээги куоттаран, хойутаан кулуупка тиийбитим хата тарҕаһа иликтэр этэ. Пашалыын үөрэ-көтө көрсөн, биһиэхэ кэлэн уруккуну-хойуккуну санаһан, астына кэпсэтэн, кэрэ киэһэни бэлэхтээбитин олох умнубаппын. Ыалларым, билэр дьонум испэктээги көрөн астыммыттар аххан этэ. «Адамовалыын бииргэ үөрэммиппит диигин дуу? Үчүгэйдик да оонньуур, кырасыабай да эбит!» диэн хайҕаабыттарыгар үөрбүтүм уонна «Знай наших» диэн киһиргээбитим.
Күн-дьыл ааһара түргэн. Кэрэ да санаалаах Прасковья Павловна  Адамова «олоҕу дьоһуннаахтык олордум» диир дьикти сааска дьоллоохтук айаннаан тиийбитэ.

Нюта ОХЛОПКОВА (Анна Егоровна Аммосова) 2020 с. ахтыытыттан