Пасха бырааһынньыгын кэннэ өрөбүл күнэ тэриллиэ дуо?

Ярослав Нилов салайааччылаах ЛДПР дьокутааттара 2026 сылтан саҕалаан Пасха бырааһынньыгын кэнниттэн өрөбүлү бэнидиэнньиккэ көһөрөргө этиилээх сокуон барылын оҥордулар. Бу туһунан сокуон барылын хос суругар быһаарыллыбыт, диэн РИА Новости иһитиннэрдэ.

«РФ Үлэ кодексатын 112-с ыстатыйатыгар уларытыылары киллэрэн, 2026 сылтан саҕалаан хас сылын ахсын Пасха өрөбүлүн бэнидиэнньиккэ көһөрүүнү бигэргэтэр»,- диир Ярослав Нилов. Пасха кэнниттэн өрөбүл күнү бэнидиэнньиккэ тэрийии итэҕэли күүһүрдэргэ уонна сааскы кэми чугас дьону кытта атаарарга кыах үөскэтэр диэн быһаарыы сурукка ыйыллыбыт.

Санаттахха, РФ Үлэ кодексатынан өрөбүл күннэри көһөрүү дойду Бырабыыталыстыбатын быһаарыытынан эбэтэр федеральнай сокуонунан бигэргэнэр.