Пассажир кыыһы куттаабыт таксыыһы туттулар

Дьокуускайга 23 саастаах таксыыһы туттулар. Эдэр киһи полиция үлэһиттэриттэн куота сатаабыт. Бу туһунан СӨ ИДьМ пресс-сулууспата иһитиннэрэр.

Өрөбүлгэ интэриниэт ситимигэр таксыыс пассажир кыыһы куттаабытын туһунан иһитиннэрии тарҕаммыта. Суоппар устудьуон кыыска сыстаҥныы сатаабыт, төлөпүөнүн нүөмэрин биэрдэҕинэ эрэ массыынатыттан таһаарыах буолбут. Полиция тута бэрэбиэркэни саҕалаабыта.

«Бу киһи полициялартан куота сатаабыт. Салгыы быһаарсарга диэн, кинини отделга аҕалбыттар», — диэн иһитиннэриигэ суруллар.

Суоппары бөлүүн 2 чаас саҕана Лермонтов уулуссатыттан туппуттар. «Toyota Allion» массыынаны уларсык илдьэ сылдьыбыт.

Таксыыска холуобунай дьыаланы тэрийдилэр уонна административнай силиэстийэ саҕаланна.