Пассажир төлөпүөнүн уорбут таксист тутулунна

Дьокуускайга 4 №-дээх полиция отделын дьуһуурунай чааһыгар киин куорат олохтооҕуттан суотабай төлөпүөнүн уонна 24000 солк. уорбуттарын туһунан сайабылыанньа киирбит.

Эмсэҕэлээбит кыыс быһаарбытынан, таксинан айаннаабытын кэнниттэн төлөпүөнэ сүппүтүн билбит, ол эрээри таксист кини гаджета массыынаҕа суоҕун эппит.

Суһал-ирдиир тэрээһин түмүгүнэн полиция үлэһиттэрэ эрдэ баайга-дуолга буруйу оҥорууга сууттана сылдьыбыт 28 саастаах эр киһи төлөпүөнү уонна харчыны уорбутун тутан ылбыттар.

Эмсэҕэлээбит кыыс суотабай төлөпүөнүн массыынаҕа алҕас түһэрбитэ быһаарылынна. Таксист кэлин смартфону булан ылбыт итиэннэ суох этэ диэн пассажирга сымыйалаабыт. Буруйу оҥорооччу өссө мобильнай баан көмөтүнэн үҥсээччи төлөпүөнүттэн харчыны бэйэтигэр көһөрө охсубут. Уоруллубут харчыны буруйдаах киһи тус наадатыгар туһаммыт.

РФ Холуобунай кодексатын 158-с ыстатыйатын 2-с чааһынан «Уоруу» ыстатыйатынан холуобунай дьыала тэрилиннэ диэн иһитиннэрэр ИДьМ Саха сиринээҕи пресс-сулууспата.