“Патриот” өрөспүүбүлүкэтээҕи күрэхтэһии кыайыылаахтарын ааттара билиннэ

Номнуо үгэскэ кубулуйбут күрэхтэһиигэ кэллиэстэр, тиэхиньикумнар 14 байыаннай-патриотическай кулууптарыттан барыта 140 устудьуон кытынна.

Тэрээһин былырыыҥҥы кыайыылаахтар баазаларыгар – Чурапчытааҕы аграрнай-тиэхиньичээскэй кэллиэскэ буолла итиэннэ кэллиэс преподавателэ, “Эр санаа” уордьан кавалера, “Саха сирин эрэлэ” бэлиэ хаһаайына Эдуард Карпов уонна кэллиэһи бүтэрбит, “Эр санаа” уордьан кавалера, “Хорсунун иһин” мэтээл хаһаайына Альберт Авксентьев кэриэстэригэр ыытылынна. Тэрээһин анал байыаннай дьайыы кыттыылаахтарын сырдык өйдөбүллэрин үйэтитэр, ыччаты патриотическай тыыҥҥа иитэр, кинилэргэ эппиэтинэс уонна гражданственность диэн өйдөбүлү олохсутар   аналлаах.

Күрэхтэһиигэ Дьокуускай куорат, Жатай, Чурапчы, Хаҥалас, Үөһээ Бүлүү, Бүлүү, Нам, Нерюнгри, Сунтаар улуустарын кэллиэстэриттэн уонна тиэхиньикумнарыттан 14 хамаанда кытынна. Икки күн устата сэттэ түһүмэхтээх тургутууну ааһан, строевой бэлэмнэниигэ, оҕунан ытыыга сатабылларын, эт-хаан өттүнэн бэлэмнэрин, байыаннай ааты-суолу билиилэрин, о.д.а. көрдөрдүлэр. Иккис күн военизированнай эстафетаҕа кытыннылар, түмүккэ канат тардыстылар.

Тыҥааһыннаах киирсии түмүгэр төрдүс миэстэни “Айтыын” сыыппара технологиятын кэллиэһин “Орион” байыаннай-патриотическай кулууба ылла. Үһүс миэстэҕэ Дьокуускайдааҕы тыа хаһаайыстыбатын тиэхиньикумун кэллиэһин “Патриот” кулууба таҕыста. И.Е.Винокуров аатынан Намнааҕы педагогическай кэллиэс “Дьулус” кулууба иккис миэстэ буолла. С.Ф.Гоголев аатынан Дьокуускайдааҕы педагогическай кэллиэс “Патриот” кулууба бастаата.

Гран-при үрдүк аат кубогын Чурапчытааҕы аграрнай-тиэхиньиическэй кэллиэс тутта. Тустаах кэллиэс устудьуоннара 2021 уонна 2024 сыллааҕы ситиһиилэрин бигэргэтэн, үһүс төгүлүн Гран-при аатын ыллылар. Бу туһунан Идэҕэ үөрэтэр кыһалары сайыннарар институт саайтыгар сырдаталлар. Номинацияларынан түмүгү манна ааҕыҥ.