«Патриотическай иитии биир кэлим систиэмэлээх буолуохтаах»

Тохсунньу 30 күнүгэр «Патриот» ыччат киинигэр патриотическай иитиигэ стратегическай сессия буолла. Бу тэрээһиҥҥэ ыччаты патриотическай иитиигэ систиэмэлээх, биир кэлим ыстандаарды булан, салгыы оҥоруохтара.

Манна аҕыс хамаанда, барыта сүүсчэкэ киһи: улуустар дьаһалталарын, судаарыстыбаннай былаас үлэһиттэрэ, уопсастыбаннай түмсүүлэр бэрэстэбиитэллэрэ кытыннылар. Кинилэр бэйэлэрин бырайыактарын, идиэйэлэрин көмүскээтилэр. Ол курдук, оскуолаларга гимни ыллааһын, көмпүүтэргэ патриотическай оонньуулары оҥоруу, уо.д.а. идиэйэлэр бааллар.

Ыччат миниистирэ Петр Шамаев бу этиллибит идиэйэлэри сэргээтэ.

«Дьокуускайга эрэ буолбакка, хас биирдии улууска, нэһилиэккэ ыччат биир систиэмэнэн иитиллиэхтээх. Саҥа систиэмэ патриотическай хайысха нөҥүө бары тэриллиилэри, түмсүүлэри, кулууптары түмүөхтээх. Биһиги сыалбыт-сорукпут — эдэр киһи үлэлиир эйгэтигэр профессионал уонна уопсастыбаҕа туһалаах киһи буоларыгар көмөлөһүөхтээхпит. Оччоҕо бу эдэр киһи эрэ буолбакка, бүтүн дойдубут эмиэ сайдыаҕа. Үлэбит үтүө түмүктээх буолуоҕар эрэллээхпин», — диэн кини эттэ.

Сотору кэминэн ыччат дьыалатын уонна социальнай алтыһыытын министиэристибэтэ уонна «Патриот» ыччат киинэ бу стратегическай сиэссийэҕэ киирбит этиилэри кытта үлэлэһиэхтэрэ, биир кэлим систиэмэни оҥорон таһаарыахтара.