Патриотическай иитиигэ — күүһү холбоон

Бүгүн патриотическай иитиигэ быһаччы үлэлии сылдьар дьон, кэлэктииптэр, оскуола, тэрилтэлэр үлэһиттэрэ, араас хамсааһыннар чилиэннэрэ «Патриот» ыччат киинигэр түмүстүлэр. Тэрээһин патриотическай иитии эйгэтигэр араас саастаах араҥаҕа Биир кэлим ирдэбили олоххо киллэриини торумнуур сыаллаах. 100-н тахса киһи  8 хамаандаҕа арахсан 8 түһүмэхтэҕинэн стратегическай сиэссийэҕэ үлэлээтилэр.  

Хамаандалар чилиэннэрэ маннык араас саастаах дьон түмсэн быһаарсан, бары өттүнэн көдьүүстээх үлэни тэрийэргэ кыттыһарбыт олус сөптөөх диэн бэлиэтииллэр. Кырдьык, бу биир киһи өйүттэн ылан оҥоһуута буолбакка, бары көлүөнэ кыттыһан, өйү-санааны холбоотоҕуна үлэ көдьүүһэ үрдүүрэ чахчы. Сиэссийэ кыттыылаахтара маннык кэпсэтии атын даҕаны эйгэҕэ олус наадалааҕын эттилэр, санааларын үлэһиннилэр.

Светлана Захарова, үөрэх эйгэтин бэтэрээнэ, 8-с хамаанда чилиэнэ:

— Биһиги ахсыс хамаандаҕа киирэбит. Биһиги 55 сааһыттан үөһэ саастаах, үлэлээбэт, сынньалаҥҥа олорор дьон ыччаты патриотизмҥа иитиигэ тугунан көмөлөһүөхтэрин сөбүй диэн бэйэбит этиилээхпит. Биһиги урукку көлүөнэ дьон, сэбиэскэй иитиини ааспыппыт, патриотизм диэн оскуола бырагырааматынан барар этэ. Ааспыт 30-ча сылга, уопсайынан иитиигэ улахан болҕомто ууруллубат буола сылдьыбыта. Кэнники үс сылтан бэттэх патриотическай иитиигэ былааннаах үлэ барда дии саныыбын. Билигин оскуолаларга оҕолор маҥнайгы күнтэн ыла, дойду уонна өрөспүүбүлүкэ өрөргөй ырыатыттан саҕалыыллар. Ону таһынан атын даҕаны тэрээһиннэр, уруоктар элбээтилэр. Патриотизм диэн төрөөбүт дойдуга сыһыан буоллаҕа дии, бу хайысханан оскуолалар үлэлии олороллор. Оттон биһиги бэтэрээннэр онно тугунан көмөлөһүөхпүтүн сөбүн манна быһаарыахтаахпыт. Стратегическай сиэссийэ буолара үчүгэй дии саныыбын. Оскуола үлэһиттэрэ, оҕо, ыччат хамсааһыннарын салайааччылара, тэрилтэлэр үлэһиттэрэ, бэтэрээннэр, араас көлүөнэ дьон мустаммыт, биир кэлим тиһиги оҥоруохтаахпыт. Маннык тэрээһини олус сэргээтим.

Эдуард Федотов, А.Е.Кулаковскай аатынан Норуоттар икки адыларынааҕы доҕордоһуу киинин информационнай-аналитическай отделын исписэлииһэ:

— Норуоттар икки адыларынааҕы доҕордоһуу киинэ ыччат лиидэрдэрин уонна араас омук төрүт култууратын холбоһуктарын кытары бииргэ үлэлиир. Биһиэхэ патриотическай үлэ күүскэ барар диэххэ сөп. 2026 сыл Арассыыйаҕа Норуоттар сомоҕолоһууларын сылынан, оттон Саха сиригэр Култуура сылынан биллэриллибитэ. Онон биһиги иннибитигэр улахан хааннаах үлэ турар. Быйылгы сыл – биһиги сылбыт. Биһиги бу сиэссийэҕэ ыччаты патриотическай иитиигэ бэйэбит бырайыактардаах кэллибит. Ыччаты тэрээһиннэрбитигэр кытыннарар сыаллаахпыт. Хомойуох иһин, аныгы кэмҥэ ыччаты угуйар арҕаа дойду сабыдыала олус улахан. Ону тосту уларытарга биир кэлим тиһиги оҥоророору бу түмүстүбүт. Ыччат дьон Ийэ дойдутун, төрөөбүт дойдутун туһугар түмсүө, үлэлиэ-хамсыа диэн эрэнэбин.