Патриотизм уонна федеральнай болҕомто: Саха сиригэр “Муус Устар” ыччат бэстибээлэ буола турар

Бу нэдиэлэҕэ Саха сиригэр Уһук Илиҥҥи ыччат биир саамай көхтөөх, киэҥ далааһыннаах бырайыага – “Муус Устар” бэстибээл буола турар.

Бэстибээл быйыл бэһис төгүлүн ыытыллар. Үбүлүөйдээх “Муус Устар” уратыта диэн патриотическай иитиигэ болҕомто уурулунна уонна статустаах элбэх федеральнай спикердэр кытыннылар. Кинилэртэн биирдэстэрэ политолог Александр Асафов бэстибээл туһунан санаатын үллэстэр:

“Дьокуускайга буола турар ыччат бэстибээлэ атын эрэгийиэннэр пуорумнарыгар майгыннаабат ураты тэрээһин. Кыттааччылар хас да хайысханан муниципалитеттарга куонкурустаһаллар, онно кыайбыттар түмүктүүр чааска түбэһэллэр. Быйыл 12 трек баар, олор истэригэр ыччат айар, креативнай кыаҕын сайыннарыы, архитектура, волонтердааһын, тыа хаһаайыстыбатын оҥорон таһаарыыта, о.д.а. бааллар. Ол эрээри Арассыыйаҕа Аҕа дойдуну көмүскээччи, Саха сиригэр Ийэ дойдуну көмүскээччи сылларынан тректэр улахан аҥардара патриотическай ис хоһоонноох буолаллара саарбаҕа суох.

Ол курдук, “Муус Устар” былаһааккатыгар өрөспүүбүлүкэтээҕи Бастакылар Хамсааһыннара ыытыллыаҕа. Ону таһынан ГТО күрэхтэһиитэ байыаннай дьайыы чаҕылхай кыттыылааҕа РФ Дьоруойун кэриэһигэр, оттон цифровой худуоһунньуктар күрэхтэһиилэрэ Кыайыы 80 сыллаах үбүлүөйүн тиэмэтигэр ананнылар. Биир сүрүн болҕомто “Лента времени” куонкуруска оҕолор Аҕа дойду Улуу сэриитин уонна онно биир дойдулаахтарын кыттыыларын туһунан билиилэрин көрдөрдүүлэригэр уурулунна. Байыаннай-патриотическай блок туспа араарыллыбыт: уолаттар байыаннай бэлэмнэниигэ уонна дрону салайыыга  күрэхтэһэллэр.

“Муус Устар” бэстибээлгэ ыытыллыбыт куонкурустар түмүктэрэ киэҥ далааһыннаах үөрэх бырагырааматынан ситэриллэллэр. Кинилэр биллэр-көстөр эспиэрдэр лиэксийэлэригэр, маастар-кылаастарыгар сылдьаллар уонна дьон санаатын түмэр салайааччылары кытта көрсөллөр. Ыччакка бу солбуллубат улахан уопут  уонна сибээһи олохтуурга бэртээхэй ньыма буолар.

Быйыл бэстибээл улахан федеральнай болҕомтону тарта. Ону кытта тэҥҥэ Дьокуускайга Госдума ыччат бэлиитикэтигэр кэмитиэтин көһө сылдьар мунньаҕа буолла. Дьокутааттар, уопсастыбаннай тэрилтэлэр бэрэстэбиитэллэрэ, федеральнай уонна эрэгийиэннээҕи былаас уорганнара патриотическай иитии систиэмэтин тупсарыы туһунан дьүүллэстилэр. Патриотическай үлэҕэ биир сомоҕо судаарыстыбаннай систиэмэни оҥорор, ону олоххо киллэрэр механизмнары уонна үбүлээһин источниктарын быһаарар наадатын тоһоҕолоон бэлиэтээтилэр. Мунньахха Саха сирэ бу үлэҕэ ыытар үлэтэ, уопута дьоһун билиниини ылла. Бу хайысха 2019 сыллаахха Ил Дархан Айсен Николаев оскуолаларга үөрэх күнүн дойду гимнын ыллатыыттан саҕалыыр туһунан ыйааҕын баттыаҕыттан биллэн-көстөн барбыта, кэлин бу быраактыка дойду үрдүнэн тарҕаммыта. Үс сыллааҕыта эрэгийиэҥҥэ анал сокуон ылыллыбыт. Өрөспүүбүлүкэ ыччат дьыалаларыгар уонна социальнай коммуникацияларыгар миниистирин э.т. Арассыыйа Дьоруойа Игорь Юргин кэпсээбитинэн, ыччаты кытта үлэҕэ биир кэлим бэлиитикэни Патриотическай иитиини координациялыыр сэбиэт салайар, аҥардас быйылгы сылга балтараа сүүс тэрээһин ыытыллара былааннанар.

Бу буолан ааспыт мунньах “Муус Устар” идеологиятыгар чуолкайдык сөп түбэһэр. Бэстибээли тэрийээччилэр эрэгийиэн инники кэскилин ыччат оҥорор диэн тоһоҕолоон бэлиэтииллэр. Ол иһин эрэгийиэн былааһын күүһэ-уоҕа ыччат төрөөбүт түөлбэтигэр, дойдутугар эппиэтинэстээх сыһыанын сайыннарыытыгар, гражданскай көхтөөх буолуутугар, устуоруйаны уонна уһулуччулаах дьону үйэтитиитигэр туһуланар. Мунньахха патриотическай иитии туһунан федеральнай сокуону оҥорууну дьүүллэһиигэ өрөспүүбүлүкэ уопутун бигэргэтэр туһунан этилиннэ”.