Пауэрлифтиҥҥэ көрөллөрө мөлтөх спортсменнарга Арассыыйа чөмпүйэнээтэ саҕаланна

Кулун тутар 24-29 күннэригэр Дьокуускайга “Кыайыы 50 сыла” успуорт дыбарыаһыгар пауэрлифтиҥҥэ көрөллөрө мөлтөх спортсменнарга Арассыыйа чөмпүйэнээтэ саҕаланна.

Чөмпүйэнээт чэрчитинэн пауэрлифтиҥҥэ (көрбөттөр успуортара) аһаҕас күөн көрсүү уонна күрэхтэһии кыттааччыларыгар абсолютнай зачет буолуоҕа.

Тэрээһин үөрүүлээх аһыллыытыгар СӨ физическэй култуураҕа уонна спорка миниистирэ Леонид Спиридонов РФ Паралимпийскай кэмитиэтин вице-бэрэсидьиэнигэр, Бүтүн Арассыыйатааҕы көрбөттөр успуортарын Федерациятын бэрэсидьиэнигэр, Арассыыйа успуордун үтүөлээх маастарыгар, Паралимпийскай оонньуулар үс төгүллээх чөмпүйүөнкэлэригэр Ольга Семеноваҕа, Арассыыйа сүүмэрдэммит хамаандаларын успуорка бэлэмнээһин киинин паралимпийскай уонна сурдлимпийскай көрүҥнэргэ управлениетын начаалынньыгар Михаил Колмыковка уонна «Вивай» тутуу хампаанньатын дириэктэрэ Серафим Пахомовка махтал суруктары туттарда.

“Бүгүн көрбөттөр ортолоругар пауэрлифтиҥҥа Арассыыйа Чөмпүйэнээтэ Дьокуускайга аан бастакытын буолар. Бу тэрээһин ураты суолталаах: өрөспүүбүлүкэбитигэр успуорт бу көрүҥүн таһыма үрдээн иһэрин, тириэньэрскэй састаап уонна Өрөспүүбүлүкэтээҕи физическэй култуураҕа уонна успуорка киинин ситимнээх үлэлэрин көрдөрөр. Биһиги өрөспүүбүлүкэбит салалтатын аатыттан Арассыыйа Паралимпийскай кэмитиэтигэр итэҕэллэрин иһин махталбытын тиэрдэбит. Бу чөмпүйэнээт үгүс спортсмен инники кыайыыларыгар трамплинынан буоларыгар бигэ эрэллээхпит», — диэтэ Леонид Николаевич.

Чөмпүйэнээккэ Арассыыйа 16 эрэгийиэниттэн кэлэн кытта сылдьаллар: Алтайскай, Приморскай кыраайдартан, Брянскай, Владимирскай, Иркутскай, Калининградскай, Калужскай, Красноярскай, Московскай, Новосибирскай, Самарскай, Тамбовскай, Челябинскай уобаластартан, Ямало-Ненецкэй, Ханты-Мансийскай автономнай уокуруктартан, диэн иһитиннэрэр Успуорт министиэристибэтин пресс-сулууспата.