Павел Кылатчанов: Күүс-көмө утумнаахтык ыытылла, салҕанан бара турар

2022 сыл балаҕан ыйыгар быстах хомуурга ыҥырыллан барбыт дьоммутугар өрөспүүбүлүкэ салалтатын, бары тэрилтэлэрин, нэһилиэнньэтин өттүлэриттэн күүс-көмө утумнаахтык ыытылла, салҕанан бара турар.

Миниистир Павел Павлович Кылатчанов СӨ Тутууга министиэристибэтин хайысхатынан мобилизацияламмыттарга уонна кинилэр дьиэ кэргэттэригэр туох көмө оҥоһулларын туһунан “Саха сирэ” хаһыат саайтыгар анаан кэпсээтэ:

— Биһиги өрөспүүбүлүкэбит анал байыаннай байыаннай эпэрээссийэҕэ кытта сылдьар дьоммутугар көдьүүстээх көмөнү туох кыалларынан оҥоро олорор. Быстах хомуур биллэриллибитин кэнниттэн СӨ Бырабыыталыстыбата ыҥырыллыбыт саллааттарга, ол иһигэр биһиги министиэристибэбититтэн эмиэ ыҥырыллыбыттара, наадалаах тэриллэри атыылаһыыны тэрийбитэ.

Тутуу министиэристибэтэ бары тэрилтэлэрин кытта бу үлэлэртэн туора турбакка, наадалаах малы-салы, тэриллэри бииргэ кииннээн атыылаһан, быстах хомуурунан ыҥырыллан барбыт дьоммутугар ыыппыта. Үлэһиттэрбит буойуттар кыайыы-хотуу аргыстаах буолалларын туһугар тус маллынан-салларынан, харчынан көмө хомуйбуттара. Тутуу министиэристибэтин «Судаарыстыбаннай сакаасчыт сулууспата» ГКУ тэрилтэтэ социальнай суолталаах бөдөҥ тутууга — 2-с №-дээх орто оскуоланы чөлүгэр түһэрии үлэтэ ыытылларыгар көмөлөспүтэ.

Бэйэ бэйэни эрэ буолбакка, дойдубут кэскилин туһугар ылыллар Бырабыыталыстыба быһаарыыларын хайаан да өйүүрбүт улахан суолталаах.