Павел Маринычев АЛРОСА генеральнай дириэктэринэн талылынна

АЛРОСА хампаанньа Кэтээн көрөр сэбиэтэ Павел Маринычевы хампаанньа Генеральнай дириэктэринэн – хампаанньа Бырабылыанньатын Бэрэссэдээтэлинэн талла.

Павел Маринычев хампаанньа генеральнай дириэктэринэн үлэлээбит  Сергей Иванову солбуйда.  Сергей Иванов АЛРОСА хампаанньаны 2017 сыл кулун тутар ыйыттан салайбыта.

«АЛРОСА Кэтээн көрөр сэбиэтигэр улахан итэҕэллэрин иһин махтанабын. Генеральнай дириэктэр дуоһунаһыгар  хампаанньа аан дойдуга алмаас ырыынагар  инники күөҥҥэ сылдьар позициятын салгыырга үлэлиэҕим.  Каадырдары бөҕөргөтүүгэ, экологическай куттал суох буолуутугар болҕомтобун ууруоҕум», – диэтэ  Павел Маринычев.

Павел Маринычев хампаанньа биир тутаах салаатын “Анаабыр Алмаастара” хампаанньаны салайан саҕалаабыта. Бу иннинэ СӨ Бырабыыталыстыбатын бэрэссэдээтэлин бастакы солбуйааччытынан үлэлээбитэ, алта сыл устата сир баайын хостуур бырамыысыланнас, энэргиэтикэ, дьиэ уонна коммунальнай хаһаайыстыба, тутуу боппуруостарын быһаарыынан дьарыктаммыта. 2014 сылтан Арассыыйа Бэрэсидьиэнин кадровай резервэтигэр киирэр.