Павел Пинигин аатынан көҥүл тустууга уолаттар ортолоругар турнир кыайыылаахтара билиннилэр

Ааспыт нэдиэлэҕэ Дьокуускайга «Триумф» успуорт уораҕайыгар Олимпийскай чөмпүйүөн Павел Пинигин аатынан уолаттарга көҥүл тустууга «Саха сирин тимир суоллара» хампаанньа бирииһигэр норуоттар икки ардыларынааҕы турнир түмүктүүр киирсиилэрэ уонна кыайыылаахтары наҕараадалааһын буолан ааста.

Норуоттар икки ардыларынааҕы турнирга уопсайа Беларусьтан, Казахстантан, Кыргызстантан, Монголияттан уонна Узбекистантан, дойду 11 эрэгийиэниттэн уонна Саха сирин бары муннуктарыттан 152 эдэр тустуук кытынна. Бу туһунан «Саха сирин тимир суоллара» хампаанньа пресс-сулууспата иһитиннэрэр.

Күрэхтэһиигэ бастакы миэстэлэри ыллылар:

• 45 киилэҕэ диэри ыйааһыҥҥа – Антон Голиков (Саха сирэ);
• 48 киилэҕэ диэри ыйааһыҥҥа – Магомед Умаров (Чечня);
• 51 киилэҕэ диэри ыйааһыҥҥа – Магомед Салихов (Дагестан);
• 55 киилэҕэ диэри ыйааһыҥҥа – Дмитрий Данилов (Саха сирэ);
• 60 киилэҕэ диэри ыйааһыҥҥа – Молвид Салатаев (Москва);
• 65 киилэҕэ диэри ыйааһыҥҥа – Доржу Игрит (Тыва);
• 71 киилэҕэ диэри ыйааһыҥҥа – Уйгун Бурцев (Саха сирэ);
• 80 киилэҕэ диэри ыйааһыҥҥа – Камиль Камилов (Дагестан);
• 92 киилэҕэ диэри ыйааһыҥҥа – Артур Слепцов (Саха сирэ);
• 110 киилэҕэ диэри ыйааһыҥҥа – Насрудин Нурахмаев (Дагестан).

Санатан эттэххэ, «Саха сирин тимир суоллара» бирииһигэр уолаттарга көҥүл тустууга Уһук Илиннээҕи турнир аан бастаан 2004 сыллаахха Хаҥалас улууһун Күөрдэм сэлиэнньэтигэр ыытыллыбыта. Бу тэрээһини «ССТС» АХ бастакы генеральнай дириэктэрэ Дмитрий Трофимов көҕүлээбитэ. Турнир чэрчитинэн 16 саастарыгар диэри уолаттарга Бүтүн Арассыыйатааҕы түһүмэх 2017 сыллаахха саҕаламмыта, оттон 2022 сылтан 18 саастарыгар диэри уолаттарга норуоттар икки ардыларынааҕы күрэхтэһиилэр ыытыллар буолбуттара.