“Педагог-бибилэтиэкэр-2022” куонкурус түмүктэннэ, кыайыылаахтар билиннилэр

Арассыыйаҕа Саха сиригэр эрэ ыытыллар “Педагог-бибилэтиэкэр” өрөспүүбүлүкэтээҕи куонкурус түмүктэннэ, кыайыылаахтар ааттара билиннэ.

Куонкуруһу С.Н.Донской-II аатынан СӨ Үөрэҕи сайыннарар уонна идэ таһымын үрдэтэр институт, үөрэх-мэтиэдикэ салаатын салайааччыта С.Э.Данилова тэрийэн ыытта. Өрөспүүбүлүкэ араас муннугуттан, уопсайа, 11 педагог-бибилэтиэкэр кытынна. Куонкурус кэтэхтэн, бырайыактыыр үлэ, бибилэтиэкэ уруога, “Дьиэ кэргэн ааҕыыта” оҕо бырайыага түһүмэхтэринэн барда. Ол түмүгэр дьүүллүүр сүбэ муҥутуур кыайыылааҕы уонна номинация кыайыылаахтарын быһаарда.

Куонкурус кыттааччыларын СӨ үөрэҕин уонна билимин миниистирин бастакы солбуйааччы Алевтина Аргунова эҕэрдэлээтэ. “Бу куонкурус Саха АССР уонна Үөрэх министиэристибэтин 100 сылларыгар ыытыллыбытынан өйдөнөн хаалыаҕа. Тохсунньуга министиэристибэ аахсыйаны уонна Ааҕыы сылын биллэрбитэ. Бүгүн манна ыраах улуустартан бибилэтиэкэрдэр кэлэн олороҕут. Бибилэтиэкэрдэр оҕону билиигэ сирдиир дьон буолаҕыт”, — диэн бэлиэтээтэ. Итиэннэ үөрэх систиэмэтигэр уларыйыы бара турарын, оскуолаларга медиа кииннэр тэриллэллэрин, манна бибилэтиэкэрдэр сүрүн кылааты киллэрэллэрин иһитиннэрдэ.

С.Н.Донской-II аатынан СӨ үөрэҕи сайыннарар уонна идэ таһымын үрдэтэр институт дириэктэрэ Ньургун Павлов: “Биһиги бу икки күн, эспиэртэр бэлиэтииллэринии, көрбөтөхпүтүн көрдүбүт. “18 заповедей народов эвенков” ураты кинигэни, бары дьиэ кэргэн кинилэр көрдөрүүлэригэр дьулуһуохтаах холобур буолар ааҕар дьиэ кэргэни, бибилэтиэкэ систиэмэтигэр саҥаны киллэриилэри көрдүбүт”, — диэн эттэ. Итиэннэ 1917 сыллаахха Саха сирин нэһилиэнньэтэ 274 тыһ. тахса киһиэхэ тэҥнэһэрин, онтон баара-суоҕа 2 % эрэ ааҕар кыахтааҕын аҕынна. Билигин дойду үрдүнэн саамай ааҕар эрэгийиэн кэккэтигэр киирсэбит диэн чорботон эттэ. “Бу куонкуруска биһиги идэҕэ сатабылы, үрдүккэ, кэрэҕэ, сырдыкка сирдиир дьону көрүөхпүтүн баҕарбыппыт. 100 сыл иһигэр баһырхай ситиһии баар – нэһилиэнньэбит ахсаана хас да төгүл эбилиннэ уонна Саха сиригэр олорор нэһилиэнньэ, бары омуктар үөрэхтэннилэр. Бибилэтиэкэрдэр ааҕыы нөҥүө култуураҕа, толкуйдуур дьоҕурга сирдээбит улахан өҥөлөөхтөр”, — диэн бэлиэтээтэ.

Куонкурус кыайыылаахтара:

1. Ньургустаана Николаевна Уваровская (Кэбээйи улууһун Мастаах оскуолата) — “Бибилэтиэкэ дьыалатыгар саҥаны киллэрии”,
2. Елена Ионовна Птицына (Мэҥэ Хаҥалас улууһун Хорообут оскуолата) — “Гражданскай көрүүгэ иитии”,
3. Мария Юрьевна Панкратова (Ньурба улууһун Ньурба 3-с нүөмэрдээх алын оскуолата) — “Оскуола бибилэтиэкэтэ — ИКТ сатабылы олохсутар сир”,
4. Надежда Аркадьевна Григорьева (Амма улууһун Амма Наахара оскуолата) — “Дьиэ кэргэн педагога”,
5. Туйаара Николаевна Харлампьева (Чурапчы улууһун гимназията) – муҥутуур кыайыылаах.

Наҕараадаламмыттар:

1. Айталина Анатольевна Харлампьева (Бүлүү улууһун Бүлүү 1-кы нүөмэрдээх алын оскуолата) – “Идэҕэ бэриниитин иһин” түөскэ иилинэр бэлиэ,
2. Изольда Николаевна Егорова (Дьокуускай куорат уокуругун Марха 1-кы нүөмэрдээх оскуолата) — “Идэҕэ бэриниитин иһин” түөскэ иилинэр бэлиэ,
3. Туйаара Николаевна Харлампьева (Чурапчы улууһун гимназията) – “Саха сирин мэтэдииһэ” түөскэ иилинэр бэлиэ,
4. Мария Юрьевна Панкратова (Ньурба улууһун Ньурба 3-с нүөмэрдээх алын оскуолата) – “Саха сирин эрэлэ” түөскэ иилинэр бэлиэ,
5. Людмила Николаевна Федотова (Өлүөхүмэ улууһун Киндигир оскуолата) – “СӨ үөрэҕириитин туйгуна” түөскэ иилинэр бэлиэ,
6. Ксения Анатольевна Вензель (Горнай улууһун Маҥаны оскуолата) — “Кэскил” оҕо таһаарыытыттан бириис,
7. Надежда Аркадьевна Григорьева (Амма улууһун Амма Наахара оскуолата) – “Идэтийии уонна оскуола бибилэтиэкэтин дьыалатыгар бэриниилээх буолуу” кубога.

Кыайыылаахтарга институт уонна идэлээх сойуус аатыттан уонна биирдиилээн тэрилтэлэртэн сэртипикээттэри, харчынан, сыаналаах уонна өйдөбүнньүк бэлэхтэри туттардылар.

Муҥутуур кыайыылаах тэттик-интервьютун уонна видеону манна көрүөххүтүн сөп.