Педагогтарга аналлаах «Көлүөнэ уопута» ураты симиэнэ түмүктэннэ

«Сосновай бор» оҕону сынньатар, чэбдигирдэр кииҥҥэ «Көлүөнэ уопута» симиэнэ улахан ситиһиилээхтик ыытылынна. Бу ураты бырайыак Саха Өрөспүүбүлүкэтин педагогическай холбоһугун — үтүөлээх сынньалаҥҥа олорор педагогическай үлэ бэтэрээннэрин, аныгы үөрэх босуобуйаларын, үөрэх бырайыактарын оҥорор педагогтары эмиэ биир дьиэҕэ түмтэ.

Уон күн устата доруобуйаларын бөҕөргөттүлэр, айар дьоҕурдарын сайыннардылар, тугунан да кэмнэммэт уопуттарын атастылар уонна учууталлар көлүөнэлэрэ истиҥ сэһэргэһии тула муһуннулар.

Тустаах симиэнэ алгыһынан уонна “Сосновай бор” киин “Түһүлгэ” саалатыгар үөрүүлээх аһыллыынан саҕаламмыта. Сценаттан Арассыыйа уонна Саха сирин Өрөгөй ырыалара иһилиннэ, кыттааччыларга эҕэрдэ тылларын СӨ Үөрэҕин уонна билимин миниистирин бастакы солбуйааччы Ньургун Павлов, педагог-салайааччылар бэтэрээннэрин Сэбиэтин бэрэссэдээтэлэ Варвара Сергеевна Иванова-Зверева уонна «Сосновай бор» киин дьаһалтатын бэрэстэбиитэлэ эттилэр.

«Бырагыраама соругунан доруобуйаны бөҕөргөтүү уонна айар үлэҕэ кытыннарыы эрэ буолбакка, саха тылыгар үөрэтэр-мэтэдиичэскэй литэрэтиирэҕэ үлэлиир усулуобуйаны тэрийии буолла. Аҕа көлүөнэ муудараһа уонна эдэр дьон эниэргийэтэ биир санааҕа түмүллэллэригэр дьулуһабыт», — диэн эҕэрдэ тылга бэлиэтээтилэр.

Симиэнэ хас биирдии күнэ бэркэ былааннанан, чэбдигирдэр, үөрэтэр, аралдьытар тэрээһиннэр дьүөрэлээн ыытылыннылар.

Кыттааччыларга күннэтэ доруобуйаны чэбдигирдэр уонна мэдиссиинэ көрүүлэрэ буоллулар,  илбийии хоһо үлэлээтэ, офтальмолог уонна диетолог быраастар сүбэ-ама биэрдилэр. Чөл аһылык, көхтөөх уһун үйэ уонна ыарыыны сэрэтии туһунан лиэксийэлэри киин үлэһиттэрэ да, ыҥырыллыбыт экспертэр даҕаны аахтылар.

Педагогтар «Символ 2026 года» арт-терапияттан, суши бэлэмниир кулинарнай уруоктан саҕалаан, скандинавскай хаамыыга, үҥкүү дьарыктарыгар тиийэ маастар-кылаастарга талааннарын арыйар кыахтаннылар. Ордук караоке, музыкальнай лото, Гиннес рекордтарын шоутун уонна үҥкүү киэһэтэ айар тэрээһиннэри сэҥээрдилэр.

Кыттааччылар кинилэргэ анаан «Назад в СССР» диэн ностальгическай квиз-оонньуу тэриллибит муусука уонна фольклор түмэлигэр, национальнай бибилэтиэкэҕэ сырыттылар, ону тэҥэ, киэһээҥҥи Дьокуускай устун дьаарбайдылар.

Симиэнэ сүрүн үлэтин түгэнинэн ааптар-учууталларга аналлаах сэминээр буолла. Ол чэрчитинэн саҥа үөрэтэр-мэтэдиичэскэй босуобуйалары оҥорууга үлэ күүскэ барда.

Артыыс Анатолий Горохов кыттыылаах, Учуутал күнүгэр аналлаах бырааһынньыктааҕы киэһэ симиэнэ чаҕылхай түгэнинэн буолла.

Симиэнэни түмүктүүр үөрүүлээх сабыллыы «Түһүлгэ» саалаҕа барда. Көхтөөхтүк кыттыбыттарын, истиҥ эйгэлэрин уонна бииргэ үлэлээбиттэрин иһин махтаннылар. «Сосновай бор» киин дириэктэрэ Варвара Васильева уонна Үөрэх министиэристибэтин бэрэстэбиитэллэрэ махтал тылларын эттилэр.

Тэрээһин Саха сирин үтүөлээх артыыһа Екатерина Саввина (Саина) педагогтар сөпкө тыыналларыгар анаан ыыппыт гимнастикатынан түмүктэннэ.

Саҥа идиэйэлэри киллэрэн, доҕордоһууну бөҕөргөтөн уонна бастыҥ педагогическай үгэстэри утумнааһыны сайыннарарга туһаайан, «Көлүөнэ уопута» симиэнэ суолталааҕын өссө төгүл итэҕэттэ, аатырбыт ааспыт кэми уонна билиҥҥи балысханнык сайдар үөрэҕи ситимниир ыйынньыгынан буолла. Кыттааччылар дьиэлэригэр саҥа билиини-көрүүнү, мэтиэдикэни таһынан, чэбдик туруктаах, сэргэхсийэн, үгүс үтүө иэйиилэнэн уонна кинилэр уопуттара ирдэнэригэр, инникитин ситиһиилэргэ тирэх буоларыгар эрэллээх тарҕастылар.

Светлана СОЛОВЬЕВА, Дина БЕЛОЛЮБСКАЯ.