Пеледуй аннынан харан турбут муус салгыы уһунна

Ленскэй оройуонун Пеледуй бөһүөлэгин аннынан харан турбут муус бүгүн муус болгуоттан босхолонон, салгыы уһунна диэн Өлүөнэ тардыытынааҕы уу салалтатын салайааччыта Петр Аргунов иһитиннэрэр.

Пеледуй аннынааҕы учаастакка уу таһыма кутталлаах таһымтан үрдүү илик. Сарсыарда уу таһыма 10 м 99 см (кутталлаах таһыма 12 м) этэ. Витим – Пеледуй учаастагынан муус киэлитинэн устар. Күнүскү дааннайынан, Пеледуй аннынан уу 2 чаас иһигэр 2 м түспүт.

Өлүөнэ өрүс мууһун алын кытыыта Пеледуй бөһүөлэгиттэн аллара, оттон үөһээ кытыыта Иркутскай уобалас кыраныыссатыгар устара бэлиэтэнэр.

Күнүскү дааннайынан, Өлүөнэ өрүс хаҥас салаатыгар, Ньүүйэ өрүскэ, муус Ленскэй оройуонун Бэчинчэ сэлиэнньэтин аннынан хойуутук устар.

Орто Наахара сэлиэнньэтин аннынан муус тохтуу-тохтуу устар. Уу таһыма 8 м 45 см (к.т. 10 м.) кутталлаах бэлиэҕэ тиийэ илик. Сарсыардатааҥы көрдөрүүнэн, суукка иһигэр 2 м. 97 см үрдээбит.

Алдан өрүскэ Чагда сэлиэнньэтиттэн Охотскай Перевозка диэри муус хамсаата, чугастааҕы икки сууккаҕа бу учаастак былаһын тухары муус барара күүтүллэр.