Пеледуйга бөрө түөрт ыты тутта

Ленскэй оройуонун Пеледуй бөһүөлэгин олохтоохторун хаһыс да күнүн бөрө куттуур. Бу бөрө номнуо түөрт ыты туппутун туһунан СИА суруйар.

«Бөрөнү бастаан олунньу 15 күнүгэр Плитка оройуонугар көрбүттэр этэ. Бу бөһүөлэк киин сириттэн балтараа килэмиэтир тэйиччи сытар чааһынай сектор. Манна бу кыыл үс ыты туппут. Бэҕэһээ аны Калинин уулуссатыгар көрбүттэр, аны түүн сыбаалка аттыгар тиийбит. Бааза оройуонун таһыгар өссө биир ыты туппут», — диэн Пеледуй олохтооҕо Петр Чешуин СИА-ҕа кэпсиир.

Пеледуй баһылыга Александр Кирсанов бөһүөлэккэ хапкааннары ииппиттэрин, ботуруул олохтоммутун, лиссиэнсийэлээх булчуттар туруммуттарын, онон кыһалҕа сотору быһаарылларын туһунан ааҕыныстыбаҕа иһитиннэрбит.