Петр Черкашин: «Сарсыарда эрдэ кэлэн быыбарга кытынным»

Бүгүҥҥүттэн, кулун тутар 15 күнүттэн, РФ Бэрэсидьиэнин быыбара саҕаланна. Саха сиригэр барыта 811 быыбардыыр учаастак үлэлиир.

Спортсмен уонна уопсастыбаннай диэйэтэл Петр Черкашин бүгүн сарсыарда быыбарга кытынна. Ол туһунан санаатын маннык үллэстэр:

— Үс күннээх РФ Бэрэсидьиэнин талар быыбарбыт саҕаланна, хас биирдии олохтоох гражданскай иэһин толоруохтаах. Мин бу эппиэтинэстээх дьыаланы уһата барбакка, быыбардыыр учаастакка тиийэ сырыттым. Сайдыы туһунан, туох тутуллубутун, үлэҕэ киирбитин туһунан элбэҕи этиэххэ сөп, ол барыта биллэр-көстөр, Арассыыйа билигин түргэнник сайдар. Мин уонна мин дьиэ кэргэним, чугас дьонум бары быыбарга кытталлар, эрэнэр хандьыдааттарыгар куоластыахтара. Мин биир бэйэм күүстээх, дьулуурдаах майгылаах, кырдьыгы этэриттэн куттаммат киһини өйүүбүн. Кини норуотун туһугар үлэлиэҕэ диэн эрэнэбин!

Арассыыйа бэрэсидьиэнигэр быыбар үс күн ыытыллар: кулун тутар 15, 16 уонна 17 күннэригэр. Быыбардыыр учаастактар 8.00 чаастан 20.00 чааска диэри үлэлииллэр.