Араадьыйа уонна сибээс үлэһиттэрин чиэстээтилэр

Бүгүн, ыам ыйын 7 күнүгэр, Дьокуускайга өрөспүүбүлүкэ сибээс бары салааларын үлэһиттэрин идэлээх бырааһынньыгар – Араадьыйа күнүгэр анаммыт үөрүүлээх тэрээһин буолла.

Бырааһынньык чэрчитинэн сибээс уонна информационнай технологиялар салааларыгар уһулуччулаах ситиһиилэринэн Петр Иванович Дудкин аатынан Саха сирин судаарыстыбаннай бириэмийэ туттарылынна.

Быйыл бириэмийэни сибээс инженерэ (телекоммуникация), 1 разрядтаах «Арктика» АУо сибээс киинин  үлэһитэ Мирослав Кузьмич Борисов тутта.

Кини өр сыллаах сыралаах үлэтинэн өрөспүүбүлүкэҕэ телекоммуникационнай инфраструктуратын сайыннарыыга дьоһун кылаатын киллэрсибитэ. Кини нэһилиэнньэни сэрэтиигэ ыксаллаах быһыы-майгы ситимин үөскэтиигэ, сыыппараҕа көһүүгэ, ону тэҥэ Арктика оройуоннарыгар сибээһи сайыннарыы уонна «112» биир нүөмэрдээх суһал сулууспа тиһигин киллэриигэ үлэлээбитэ.

СӨ Бырабыыталыстыбатын Бэрэссэдээтэлин солбуйааччы Анатолий Семенов салааны сайыннарыыга үрдүк профессионализмын уонна кылааты киллэрбитин бэлиэтээтэ. «Мирослав Кузьмич салаа саамай ытыктабыллаах уонна уопуттаах исписэлиистэриттэн биирдэстэрэ. Биһиги өр сылларга бииргэ үлэлээбиппит, быйыл бочуоттаах наҕараада киниэхэ туттарыллыбытынан олус үөрдүм», — диэн Анатолий Семенов бэлиэтээтэ. Ону тэҥэ хаачыстыбалаах уонна табыгастаах сибээһи сайыннарыыга, ону тэҥэ маассабай иһитиннэрэр сириэстибэлэргэ кылааттарын киллэрбит атын исписэлиистэри эмиэ үөрүүлээхтик бэлиэтээтилэр.

Бу күн Саха сиригэр сибээһи сайыннарыыга үлэлээбит исписэлиистэри — Николай Васильевич Николаевы, Александр Ильич Борисовы, Афанасий Степанович Архиповы, Борис Иннокентьевич Авдеевы уо.д.а. ахтан-санаан аастылар.

Анатолий Семенов сибээс тэрилтэлэригэр махталын биллэрдэ. «Идэлээх бырааһынньыккытынан бэтэрээннэри уонна сибээс салааларын үлэһиттэринэн өссө төгүл эҕэрдэлиибин! Эһиги кыһамньыгытын биһиги өрөсүүбүлүкэбит саҥа саҕахтары арыйарыгар уонна салгыы ситиһиилэри дабайарга көҕүлүүр», — диэн кини иһитиннэрдэ.