Петр Шамаев Алдаҥҥа волонтерскай уонна патриотическай тэрилтэлэргэ сырытта

СӨ Ыччат дьыалаларыгар уонна социальнай коммуникацияларга миниистирэ, байыаннай дьайыы кыттыылааҕа Петр Шамаев, Алдан улууһугар үлэтин сырыытынан олохтоох волонтерскай уонна байыаннай-патриотическай тэрилтэлэр үлэлэрин кытта билистэ. Көрсүһүүлэргэ көҥүл өттүнэн көмөлөһүү кииннэрин сайдыытын, чөл олоҕу тарҕатыы уонна тулаайах оҕолорго өйөбүл боппуруостарын дьүүллэстилэр.

«Көҥүл өттүнэн көмөлөһөөччүлэр-волонтердар биһиги көмүскээччилэрбитин — байыаннай дьайыы кыттыылаахтарын өйүүргэ сүҥкэн суолталаахтар. Кинилэр гуманитарнай көмөнү оҥороллор, байыастар дьиэлэригэр төннөн кэллэхтэринэ олоххо үөрэниилэригэр көмөлөһөллөр уонна чугас дьонноругар моральнай өйөбүл буолаллар. Кинилэр сыралаах үлэлэрэ дойдубут көмүскэлгэ уонна сомоҕолоһууга наадыйар ыарахан кэмигэр, биһиги норуоппут дьиҥнээх күүһүн көрдөрөр», – диэн Петр Шамаев бэлиэтээтэ.

Алдан улууһугар үлэлиир «Добро центр» федеральнай тэрилтэ салаата, «Дари добро» уопсастыбаннай тэрилтэ, нэһилиэнньэни өйүүргэ улахан социальнай үлэни ыытар. Тэрилтэ кыаммат, элбэх оҕолоох ыалларга, соҕотох олорор дьоҥҥо, инбэлииттэргэ, ону таһынан байыаннай дьайыы кыттыылаахтарын дьиэ кэргэттэригэр көмөлөһөр. Уопсастыбанньыктар дьиэ-уот үлэтигэр көмөлөһөллөр, таҥас-сап түҥэтэллэр, эбиэти таһаллар, култуурунай уонна сынньалаҥ тэрээһиннэри, субуотунньуктары ыыталлар. Ону таһынан, кинилэр байыаннай дьайыы кыттыылаахтарыгар эбии таҥас-сап тигэллэр.

Волонтердар миниистиргэ бэйэлэрэ тикпит бүргэс таҥастарын көрдөрдүлэр. Петр Шамаев Алданнааҕы «Хаарчаана» оҕо уһуйааныгар сылдьан, оскуолаҕа киириэн иннинээҕи саастаах оҕолору байыаннай-патриотическай иитии бырагырааматын кытта билистэ. Уһуйаан үлэһиттэрэ оҕолорго дойдуларынан киэн туттар, устуоруйатын убаастыыр санааны иҥэрэр иитии үлэтин уратыларын туһунан кэпсээтилэр. Төрөппүттэрэ байыаннай дьайыыга кытта сылдьар иитиллээччилэр дьиэ кэргэттэрин өйүүр боппуруостарга ураты болҕомто ууруллар. Алданнааҕы тулаайах оҕолорго уонна төрөппүт көрүүтэ суох хаалбыт оҕолорго көмө киинигэр,  байыаннай дьайыы кэмигэр иэстэрин толоро сылдьан өлбүт иитиллээччилэрин кэриэстээн, киин туруорбут өйдөбүнньүк дуоскатыгар сибэкки уурдулар.

Тэрээһин кыттыылаахтара олохторо хорсун быһыы, эр санаа уонна байыаннай иэскэ бэриниилээх буолуу холобура буолбут уолаттар бойобуой хорсун быһыыларынан киэн тутталларын эттилэр. Ону таһынан, миниистир Алдан улууһугар парашют успуордун сайыннарар уонна тарҕатар Уопсастыба уонна «Биһиги туспутугар!» уопсастыбаннай тэрилтэ кэлэктииптэрин кытта көрүстэ.