Петр Шамаев: «Ханнык баҕарар ыччат тэрилтэтигэр киин аана аһаҕас»

Бүгүн Саха сиригэр бастакы элбэх функциялаах «Патриот» ыччат киинэ аһылынна.

Бу киин Уһук Илиҥҥэ биир бөдөҥ уонна технологическай өттүнэн хааччыллыылаах былаһаакканан буолар диэн СӨ ыччат дьыалатын уонна социальнай алтыһыытын миниистирэ Петр Шамаев эттэ:

— Бүгүн биһиги элбэх функциялаах «Патриот» ыччат киинин үөрүүлээх быһыыга-майгыга астыбыт. Саха сирин бырабыыталыстыбата уонна федеральнай киин өйөөннөр маннык улахан дьиэни буламмыт, үлэҕэ киллэрдибит. Ыччат дьон бэйэлэрин бырайыактарын олоххо киллэриэхтэрэ, олоххо миэстэлэрин буларга дьулуһуохтара, айыахтара-тутуохтара, сайдыахтара. Манна компьютернай саалаттан саҕалаан «Ийэ хоһугар» тиийэ барыта баар. Бу дьиэ бүтүннүү үлэҕэ киирдэҕинэ, олус элбэх ыччаты хабыа. «Патриот киинин сүрүн сыала-соруга – патриотическай дьарыктары сайыннарыы уонна ыччат бэйэтин баҕа санаатын толорор усулуобуйатын тэрийии буолар. Киин олоххо көхтөөх ыччат “иккис дьиэтин” курдук буолуоҕа диэн эрэнэбит. Кинилэр манна көрсүһүөхтэрэ, уопут атастаһыахтара, бырайыактарын олоххо киллэриэхтэрэ. Ханнык баҕарар ыччат уопсастыбаннай тэрилтэтигэр бу киин аана аһаҕас буолуоҕа.