Петр Шамаев: «Кылаабынайа – тыыннаахпын»

Ыччат миниистирэ Петр Шамаев –  байыаннай дьайыыга бааһырыытын туһунан бу күннэргэ бэйэтин телеграмм-ханаалыгар таһаарда.

Петр Шамаев ааспыт сыл балаҕан ыйыгар бэйэтин баҕатынан хантараак баттаһан  байыаннай дьайыыга барбыта. Кини олунньу ортото хантараага бүтэн, дойдутугар эргиллэн кэлиэхтээх этэ.

Кини тохсунньу бүтэһик күнүгэр дьиэтээҕи аһылыгы аһыахпын баҕарабын, тушенка уонна армейскай кураанах астан хал буоллум, биир да ньуосканы сиэ суох курдук буолабын эрээри, киэһэтин тотуохпар диэри син биир сиэн кэбиһэбин диэн суруйбута. «Эмискэ сүһүөхтэрим ыалдьар буоллулар, арааһа, аспыттан быһыылаах. Битэмиин иһэн саҕалаатым – ыалдьара арыый аматыйда. Сотору дьиэбэр тиийиэм, онно дьиэм аһын тото-хана сиэм» диэн телеграмм-ханаалыгар таһаарбыта.

Ол эрээри олунньу 1 күнүгэр бойобуой сорудаҕы толоро баран иһэн миинэҕэ тоҕу тэптэрэн улахан эчэйиини ылбыта.  Ол туһунан кини маннык суруйар: «Туманнаах сарсыарда дрону көтүтэр саҥа сири көрдүү разведкаҕа барбыппыт. Бастакынан баран иһэн миинэҕэ дэлби тэптэрбитим. Сэрэҕэ суохпуттан. Ол сиргэ эрдэ сылдьыбыт буоламмын, билэбин дии санаабытым».

«Оннук, сэриигэ маннык эмиэ буолар. Кылаабынайа – тыыннаахпын. Миигин эвакуациялаабыт дьоҥҥо барыларыгар махтанабын, ордук чуолаан, Момонҥа – кини миигин 4 км тахса ыраах сиртэн санныгар сүгэн таһаарбыта. Оту-маһы, буомнары туораан, арыы тыа устун… Белгородка диэри үс күн айанныыр сир. Айаннаан иһэн аара госпиталларга эпэрээссийэлээбиттэрэ. Биир суукканан – Москва. Олунньу 1 күнүн сарсыардатыгар бааһырбытым, олунньу 5 күнүгэр түүн үөһэ Москваҕа кэлбитим. Манна өссө эпэрээссийэлээбиттэрэ – атахпын өссө кыратык быспыттара. Бу номнуо төрдүс эпэрээссийэм быһыылаах. Өссө биирдэ эпэрээссийэлииллэрэ буолуо, ол гынан баран быраастар да, мин да таайан этэр кыахпыт суох» диэн Петр Шамаев кэпсиир.

Билигин сүрүн сорук – чөлбөр түһүү, кэлээскэҕэ олорор уонна айанныыр буоллум, быраастар эмтииллэр, бэйэбин быдан чэпчээбит курдук сананабын, дьиэбэр өтөрүнэн барбаппын диэн байыас санаатын үллэстэр.