Петр Шамаев: «Күрэхтэһиигэ күүс-күдэх эрэ буолбакка, өй-санаа, билии-көрүү, үөрүйэх элбэҕи быһаарыа»

Бүгүн Бүтүн Арассыыйатааҕы байыаннай-тактическай «Путь воина» күрэхтэһии аһылынна. Күрэхтэһиигэ Арассыыйа түөрт эрэгийиэниттэн: Хабаровскай кыраайтан, Волгоградскай уобаластан, Тюмень уобалаһыттан уонна Саха сиритэн сүүмэрдэммит хамаандалар кытталлар.

Арассыыйатааҕы байыаннай-тактическай «Путь воина» күрэхтэһии туһунан сүрүн тэрийээччилэртэн биирдэстэрэ, СӨ Ыччатын дьыалаларыгар уонна социальнай коммуникацияларга миниистирэ Петр Шамаев санаатын үллэһиннэ:

— Маннык улахан суолталаах күрэхтэһии биһиэхэ аан бастаан ыытыллар.  «Путь воина» диэн бүтүн Арассыыйатааҕы байыаннай-тактическай күрэхтэһии буолар. Финалга биһиги өрөспүүбүлүкэбит сүүмэрдэммит хамаандата кыттар чиэскэ тиксибититтэн олус үөрэбит. Кинилэр бу иннинээҕи түһүмэххэ бастыҥ көрдөрүүлээх буолбуттара. Иккис хамаанданы 1 мүнүүтэ 1 сөкүүндэнэн кыайбыттара. Бу көрдөрүүнү тута сылдьарбыт буоллар диэн баҕа санаалаахпыт. Финалга түөрт хамаанда тахсыбыта, билигин бастыыр иһин киирсиэхтэрэ. Күрэхтэһии бүтүн дойду үрдүнэн ыытыллар. Манна кэлбит оҕолор биһиги хамаандабытын кытары киирсиэхтэрэ, биһиги култуурабытын кытта билсиэхтэрэ, кэрэ айылҕабытын көрүөхтэрэ. Кыттааччылар манна ылбыт уопуттарын дойдуларыгар тарҕатыахтара диэн эрэрнэбит. Маннык быһыылаах барар оонньуулар Арассыыйаҕа аан бастаан ыытыллаллар. Түһүмэхтэрэ хатыламматтар. Олус улахан иэннээх сиргэ оҕолор бэйэ-бэйэлэрин булуохтаахтар, каартаны, сыыппара тэриллэри, дроннары туһаныахтара. Манна күүс-күдэх эрэ буолбакка, өй-санаа, билии-көрүү, үөрүйэх элбэҕи быһаарыа. Саха сирэ үөрүйэх, уопут да өттүгэр, элбэҕи биэриэҕэ дии саныыбын.