Петр Шамаев «Миротворец» саайт испииһэгэр киллэрилиннэ

СӨ Ыччат дьыалаларыгар уонна социальнай коммуникацияларга миниистирэ Петр Шамаев Украинатааҕы «Миротворец» диэн экстремисткэй саайт испииһэгэр киирдэ.

Байыаннай дьайыы этэрээнэ иһитиннэрбитинэн, кинини «байыаннай буруйу оҥорооччуларга» киллэрбиттэр. «Өстөөх өттүттэн бэйэбэр маннык болҕомто ууруллубутугар соһуйдум, ол эрээри ити чахчыга үөрдүм. Бу саайт миэхэ туох да хоромньуну аҕалбат, тас дойдуга харчым суох, уоппускабын төрөөбүт өрөспүүбүлүкэбэр сааскы куска уонна от үлэтигэр атаарабын», — диэн кини бэйэтин ТГ-ханаалыгар суруйбут. Түгэнинэн туһанан, кини бэйэлэрин үчүгэй өттүттэн көрдөрбүт FPV-дроннар тустарынан кэпсээтэ.

«Биһиэхэ, биллэн турар, бастакы түмүктэрбит Судоплатов хампаанньатын оҥорон таһаарбыт дроннарынан этилэр. Ол эрээри биир мөкү өрүттээхтэрэ: бырагырааманан хааччыйыыга алҕастары көннөрөргө олус уустуктар. Бу тиэмэҕэ дириҥник киирбэппин, ол эрээри оҥорон таһаарааччыга көннөттөрө ыытарга күһэллэрбит, оттон ити сэрии усулуобуйатыгар олус табыгаһа суох», — диэн миниистир ахтыытын үллэстэр.

Миниистир «Саха дрон» хампаанньа оҥорон таһаарбыт, «Хотойки» диэн ааттанар, беспилотниктара көдьүүстээхтэрин бэлиэтээтэ. «Мин бу дьыалаҕа уопутум суоҕа, ол эрээри уопуттаах пилоттар, кинилэргэ „Хотойки“ кэлэн иһэллэр диэбиттэригэр, олус кыыһырбыттара уонна бу сэриигэ туттарга табыгаһа суохтар диэн кэпсиир этилэр. Ол эрээри! „Хотойки“ биһиги барыбытыгар соһуччу „холбукаттан“ эбии бырагыраама туруоруута суох көппүттэрэ. Ону таһынан, атын оҥорон таһаарааччылар FPV-дроннара тиийбэт позицияларыгар тиийэ көтөллөрө. Кистэлэҥэ судургу этэ: бары наадалаах туруоруулары оҥорон таһаарааччы оҥорбут, ол аата дроннар „холбукаттан“ көтөллөр диэн буолар. Периферия барыта пилот пультугар уонна ачыыккатыгар „забиндена“ (сөпкө туруоруллубут уонна баайыллыбыт) этэ. Бу эмиэ кэми кэмчилиирэ. Оттон түмүгү биэрэр сүрүн чааһа — видеоны уонна салайыыны биэрэр передатчиктарга аналлаах частотаны уларытааччылар. Бу тугуй? Бу, биһиги атын FPV-дроннар көппөт радио-долгуннарын туһанар кыахтаахпыт, онон ити долгуннары өстөөх РЭБ-станциялара бүөлээбэттэр диэн буолар», — диэн Петр Шамаев суруйбут.

Кини Саха сириттэн сылдьар дрон Украина Сэбилэниилээх күүстэрин тааҥкатын урусхаллаабыт видеотын үллэһиннэ. «Чуолкайа суох сыаната 30 мөл. солкуобайдаах тааҥка 45 тыһ. солкуобайдаах дронунан урусхаланна. Бу, этиигэ даҕатан эттэххэ, эмиэ суолталаах чахчы: биһиги дроннарбыт сыаналара биллэ чэпчээтэ. Өссө хас да мөлүйүөн солкуобайдаах УСК аармыйатын ыарахан дрона урусхалламмытын көрүөххүтүн сөп. Маннык кыайыылар номнуо аҕыйаҕа суохтар», — диэн кини иһитиннэрдэ.