Петр Шамаев протезка үөрэнэргэ туһалаах сүбэлэрэ

СӨ Ыччакка уонна социальнай коммуникацияҕа миниистирэ Петр Шамаев бэйэтин ТГ-ханаалыгар саҥа протезка үөрэнэн эрэрин туһунан кэпсээтэ уонна маннык балаһыанньаҕа түбэспит дьоҥҥо туһалаах сүбэлэрин кытта үллэһиннэ.

«Хас да нэдиэлэ устата протез саҥа гильзатын сөпкө түбэһиннэрэ сатыыбыт. Сүрүннээн бу мин үлэм кыраапыгыттан тутулуктаах. Ол да буоллар, түмүктэнэрэ чугаһаата. Бүтэһик көрүҥэ сөп түбэстэ быһыылаах, билигин чуолаан ити протеһынан хаамабын уонна быһыллыбыт атаҕым (культя) үөрэнэригэр эрчийэбин. Урукку гильзатааҕар быдан табыгастаах, ол эрээри тириим вакуумтан арахсан хаалбыт буолан, хабахтар тахсаллар. Бу гильза уһуннук сулууспалыа диэн эрэнэбин», — диэн суруйар Петр Шамаев.

Протезтаах дьоҥҥо сүрүн сүбэлэр:

1. Балыыһаттан тахсарга ыксаамаҥ. Протезка тура охсорго тиэтэйимэҥ. Госпитальга баар кэмҥитигэр бары наадалаах процедуралары ыларга кыһаллыҥ. Туох кыһалҕалааххытын, табыгаһа суоҕун быраастарга бэйэҕит кэпсээҥ. Быһыллыбыт атах (культя) толору оһуохтаах.

2. Бастайааннай протеһы кэтэргэ тиэтэйимэҥ. Боруобалыыр (үөрэнэр) протеһы биэрдэхтэринэ, кыалларынан өр, икки нэдиэлэттэн итэҕэһэ суох кэтиҥ. Сорохтор оннооҕор биир ый устата кэтэллэр. Бу атаххыт бигэ туруктанарыгар наадалаах. Оччоҕо бу гильзаҕытынан өр сылдьыаххыт.

3. Быһыллыбыт атаххытын (культяны) эрчийиҥ. Өскөтүн атаххыт түргэнник куурар, уҥуохтаргыт быһаччы гильзаҕа анньыллан, хаамарга ыарыылаах буолуо.

4. Гигиенаны тутуһуҥ. Атаххытын унн агильзаны күн аайы сууйуҥ. Сөптөөх маастары туһаныҥ – тирии хайыта барар, оттон вакуум иһигэр ханнык баҕарар баас сүһүрүөн сөп. Бу – улахан кыһалҕа, ардыгар балыыһаҕа эрэ быһаарыллар. «Барыгытыгар үтүөнү! Чэгиэн-чэбдик буолуҥ!», — диэн Петр Шамаев суруйар.